YKan. 39 - Yus Papí: Shuarja̱i̱ Yus Yamaram Chicham Najanamu

Aentsu iwiaakmari̱ṉkia wárik naṉkaamaiti

Kantamtikniun ju̱ kanta Tawit áaruiti.

¹ Winia wekaamurun péṉker wainkiattajai wiki tumammiajai. Yusan enentáimtichu iiru pujai̱ṉ winia chichampruja̱i̱ yajauchin chichaka̱i̱j tusan emetatajai tímiajai.

² Múutmaran chichatsuk pujusmajai núnisaṉ péṉker ana nunasha chichatsuk takamtak pujumjai tura winia najamamurka nú arant najatrukmai.

³ Wikia enentái̱rui̱ keá núnis nekapmiajai. Túmak mayai̱run ishitrúkmatai ji keá núniakui jú̱nisan tímiajai.

⁴ Maa Uunt Yusá winia tsawantur ímiatai náṉkatka nu tura ántsaṉ tsawantur nekapmarma nusha nékamtikruata. Wikia íraraitjiana nunasha nekaataj tímiajai.

⁵ Nekaata, winia iwiaakmarka tí sutarach surusuitme. Tuma asa Ámiji̱a̱i̱ṉkia winia iwiaakmar atsana áintsaiti. Ti nekas ashí aentska jú̱ umpuirik ikiajniáktinia áintsaiti. (Séraj)

⁶ Aentsu iwiaakmari̱ṉkia ajeta núnisaiti. Ti nekas peṉké ántar kuítian iruran ikiuktiaj tusa ti takakmainiawai. Túrasha nu kuit yanaᵏⁱ juákat nuna nékatsui.

⁷ Maa Uunt Yusá yamaisha ¿warinia nákastataj? Wikia Áminiak enentáimtajme.

⁸ Ashí winia tunaaruí̱ya̱ aṉkant awajtusta. Aents péṉker enentáimkiachua nu wishikrat tusam iniaitiusaip.

⁹ Múutmaran pujusmajai. Kame Ámeka ju̱ka túriniaitme.

¹⁰ Ame asutkiarmeka wini̱ya̱ akankata. Ame uwejmiji̱a̱i̱ asutiam amuukaitjiai.

¹¹ Aentska yajauchiri̱n asutiámuja̱i̱ jintinniuitme. Túram ni shíirmari̱ṉkia ka̱ya̱ nútikiam emesniuitme. Ti nekas ashí aents jú̱ umpuim aya méṉkawai. (Séraj)

¹² Wi seajmena nu Uunt Yusá antukta núnismek wi seajme nusha anturtukta. Tura wi úutai̱ṉᵏⁱ ántutsuk pujusaip. Wi Ámiji̱a̱i̱ṉkia íraraitjiai. Wi shuar wekain armia nuja̱i̱ wisha méteketjai.

¹³ Ame íirmena nuka iniaitiusta. Tuke játsuk pujusan warastaj.