YKan. 38 - Yus Papí: Shuarja̱i̱ Yus Yamaram Chicham Najanamu

Wáitiakur Yus untsuamu

Tawit Yusan enentáimtu pujuttajai tusa ju̱ kanta áaruiti.

¹ Uunt Yusá suir kaje̱nturkam chichartukaip tura kajetcha kajekam asutiuáwaip.

² Ame naṉkiram winia aya̱shrui̱ akumturkarai tura Ame uwejém winia aya̱shrui̱ akattúrkiyi.

³ Ame kajetáirmiji̱a̱i̱ winia aya̱shrui̱ṉkia yajauch awajkámu asan péṉkerka peṉké atsawai wi yajauch túrutairja̱i̱ ukunchrui̱sha ayama pujatsui.

⁴ Winia yajauch túrutairuk muukruncha naṉkaikiyi. Túmak ti kijin muuknum patatkamua nútikrua nu arant awajtúsai.

⁵ Winia wáurtairja̱i̱ṉ winia kuímiarka pukumanch piak meje̱a̱wai.

⁶ Punukan peṉké péejchach ajasjai. Tuke tsawant uutu wekaajai.

⁷ Núnisaṉ winia tuntuprui̱ṉkia ashí kápa̱a̱r awajtuiniawai tura winia aya̱shrui̱ṉkia péṉkerka atsawai.

⁸ Aya̱shnium ju̱yu̱ awajsamu asan kakarmachu nekapeajai. Tura wi kaje̱ntka núnis nekapeakun wikia utjai.

⁹ Maa Uuntá Ame pujamunmaṉka wi wakeramuka ashí Amiin írunui. Tura wi útmaka Aminí̱ṉkia úmkachminiaiti.

¹⁰ Winia enentái̱rka tí warik tek tek ajawai tura kakarmachu ajasjai. Tura winia ji̱ru tsáapnintri̱nkia ikiurkiyi.

¹¹ Kuchapja̱i̱ jaa asamtai winia amikrusha tura winia tsaniṉkia wekatairsha wini̱ya̱ṉka íkiaṉ ajainiawai tura wí shuarsha nisháa kanakí̱ pujuiniawai.

¹² Winia mantuataj tusa e̱a̱tainia nuka jintian akirturainiawai. Núnisaṉ winia yajauch awajtústaj tusa wakerutiarma nuka mantuataj turutainiawai tura ashí tsawant anaṉkruatniun iwiarturainiawai.

¹³ Túrasha wikia empekua núnisan ántatsjai tura muutua núnisan chichaatsjai.

¹⁴ Wikia aents ántichua núniniaitjiai núnisan chichamprumakchamnia núniniaitjiai.

¹⁵ Uunt Yusá Ámin nákajme. Ámeka Uunt Yus winia Yusru ai̱rkattame.

¹⁶ Wi atajkintramtai winia wishikrurara̱i̱ṉ tímiajai. Wíniaka iniarmatai nupetkáji tu enentáimturacharti.

¹⁷ Kame wikia iniastatuk pujajai tura winia najamprutamurka nu arant tuke ajakí̱ wéawai.

¹⁸ Tuma asamtai winia tunaarunka etsertumakin wétatjai. Winia yajauchirja̱i̱ṉ kúntuts pujustatjai.

¹⁹ Winia nemasur ainia nuka yajauch túratniun júujut enentáimin tura kakaram áiniawai. Tura warí itiurkachmanum nakitruinia nuka kawentrukarai.

²⁰ Wi péṉkernumaani̱ wekáa asamtai winia nemasur péṉkerja̱i̱ yapajtiutsuk antsu yajauchinmaani̱ yapajtiúkarai.

²¹ Maa Uunt Yusá ajapa iniaitiusaip. Winia Yusru wini̱ya̱ṉka kanakip.

²² Kame yáintkiataj tusam winia uwemtikrin Uuntá wárik juiktá.