YKan. 36 - Yus Papí: Shuarja̱i̱ Yus Yamaram Chicham Najanamu

Yusa waitnenkartutairi̱

Yusa yaintri̱ Tawit kantamámu

¹ Yusan umircha ainia nuka aya yajauch túratniunak enentáimtuiniak ni yajauch túrutairi̱ji̱a̱i̱ṉ Yusan ashamkacharu ajasáru áiniawai. Rum. 3:18

² Tuma ásar ni yajauch túrutairi̱ nekarna nakitniartatna núnaka enentáimtsuk, ni íimiaskeka witsukaitjia péṉkerna tu enentáimiainiawai.

³ Tura yajauch chichamtin nuyá̱ wáitrin áiniawai. Ántsaṉ esetar enentáimkiachu ajasáru áiniawai. Tuma ásar péṉker túrutairi̱sha peṉké atsuiniawai.

⁴ Kame peakri̱n tepesar aya yajauchiniak enentáimtú tepen áiniawai. Yajauchiniak unuimiátka ásar ni yajauch enentáimtairi̱nkia kajinmátkitniun peṉké tujintiainiawai.

⁵ Uunt Yusá ame waitnenkartutairmeka tura ame chichammiji̱a̱i̱ ímiatrusmek umitiáirmesha náṉkatkachu asa nayaimpia ímianaisha jeawai.

⁶ Ame nekasa nuja̱i̱ métek túrutairmeka Yusa naintri̱ umuchkiachmin ainia núnisaiti. Núnisaṉ nekasa nuja̱i̱ métek sumamtiktairmesha uunt nayantsa núnisaiti. Tuma asam aentsush tura yajasmasha mash wainiainiame.

⁷ Tuma asa Yusá, ame waitnenkartutairmesha timiá péṉkeraiti. Tuma asakmin atash uchirí̱n etektuk pujurna núnis aentska Amiin weanainiawai.

⁸ Ju̱ nuṉkanam núkap yurumáwar nútsurartinia ánis Amiiya̱ péṉkera nu ementutsuk suíniame. Núnismek púkuni entsa umartinia ánis Ame shíirum tuke súsartatme.

⁹ Núnisaṉ tuke pujustin sukartinmeka Ameketme. Tuma asam ame tsáapnintrumsha ii enentái̱n tsáapniawai. Jṉ. 4:14

¹⁰ Áminiu ainia nuka waitnentainiame. Kame Aminiak enentáimturmania ásarmatai péṉker túratin súsarta.

¹¹ Waantu enentáimtumainia nú wishikrara̱i̱ṉ tusam tsaṉkamprukaip. Ántsamek Yusan enentáimtichu ainia nú Amiiya̱ akantúrkiara̱i̱ṉ tusam íirsata.

¹² Túrutawakminkia yajauchin túrin ainia nuka iniaru ártatui. Tura nupetkamu ásar atakka yajauchin túrachmin ajasártatui.