YKan. 35 - Yus Papí: Shuarja̱i̱ Yus Yamaram Chicham Najanamu

Ii nemasri̱ya̱ aṉkant awajtúsat tusar Yus seamu

Tawit kantamámu

¹ Uunt Yusá winia kajertuiniak jatetainia nuya̱ṉka Ame ayamprutkata. Tura wiji̱a̱i̱ mánaiktinian wakeruinia núja̱i̱sha Ame mánaitrukta.

² Ayamprutkataj tusam naṉkiram tura puya̱rum achikiam yáintkiata.

³ Naṉki achikiam winia apapétainia nuna jinti̱ akirtuata. Túram winia wakaniur chicharkum “Witjiai ámin uwemtikniunka” turuttia.

⁴ Winia mantuataj turutainia nu natsa̱a̱rar natsanmai̱ enentáimtumasarti tura ni enentáimmiari̱ pachimprukarta. Núnisaṉ itiurchat awajsatniun chichaman jurutainia nu waketkiar natsanmai̱ áujmattai̱ ártí.

⁵ Tura nú aentsnaka nase wampuishin júana nútikia Uunt Yusa suntari̱ jukí̱ yajá ajapati.

⁶ Nu arant ni jinti̱ṉkia ashamái̱ tura atajkintramnia atí tura Uunt Yusa suntari̱ pataatukarti.

⁷ Peṉké ántar ni nekari̱n wá̱a̱nam u̱u̱k aepruttsarai tura peṉké antar wínian wa̱a̱n táutrurarai.

⁸ Niṉkia nekamainiatsa̱i̱ṉ yapajkiaram emeskarta tura nekan u̱u̱k áepsarmiania nui̱ṉ nemakarti. Túruna ní emesratniunmaṉ nisha iniararti.

⁹ Nuiṉkia wi Uunt Yusja̱i̱ warastatjai. Túruna winia uwemtikkiartutairi̱n warastatjai.

¹⁰ Winia aya̱shur chichartamuk Uunt Yusá chíkich yus Ámiji̱a̱i̱ métekka atsawai túrutui. Niji̱a̱i̱ naṉkaamas kakaram ainia nuyá̱ wáitias pujuinia nu aṉkant awajáiniame. Túram kuítrincha tura atsumainia nunasha atantainia nuya̱sha uwemtikme.

¹¹ Aya ántar chichaman jurutsar wantinkiar wi nékatsjana nuna inintrútainiawai.

¹² Winia wáitkiasartai tusar péṉkerja̱i̱ yapajtiutsuk antsu yajauchiji̱a̱i̱ yapajtiúkarai.

¹³ Túmaitkiuisha ni jaa tepearma nuiṉkia suí̱r pushin entsarmajai túran enentái̱rji̱a̱i̱ ijiarmámjai túran wi wáitsamaj nuja̱i̱ seamunka nunak awaiṉki̱ seamjai.

¹⁴ Winia tsaniakmar jakamtai núnisaṉ yatsursha tura nukursha jákarmatai ajakmár uutua núnisan ju̱cha enentáimpran pujumjai.

¹⁵ Antsu wi tukumkamtai nuiṉkia tsanumprutin ainia nu warartusar wikia nekachmanum iruntrarmai. Iniaitiutsuk áujmatrus amutkarmai.

¹⁶ Wishikiartinkia shiir enentáimturtsuk núnisaṉ wáitrin áiniana nuka winia kajertuiniak nai̱n tee esaiyar ajarmai.

¹⁷ Uunt Yusá ¿urutáik ju̱sha íisartatam? Winia emesturtaj tuinia nuya̱sha tura úunt ya̱wa̱i̱ya̱sha uwemtikrurta.

¹⁸ Aents tu̱a̱kmanum tí yumiṉsattajme núnisaṉ aents núkap iruntramunmasha kantamkun shiir awajsattajme.

¹⁹ Tura ántar nemasmatkaru ainia nusha winia warartuscharti. Núnisaṉ peṉké antar nakitruiniak mitsumprútacharti. YKan. 69:4; Jṉ. 15:25

²⁰ Nu aentska péṉker pujushtan chichainiawai. Antsu ashí kajechu ainia nuna anaṉkatai tusar chichaman juruiniawai.

²¹ Tura charáa charáa awajtuiniak “¡Jmm jmm paij, yamaikia nekas wáinkiaitji!” turuttainiawai.

²² Uunt Yusá, Ame ju̱ túruinia nusha wainkiame, takamat pujusaip Uuntá wini̱ya̱ṉka kanakip.

²³ Winia Yusru, Úuntur asam wárik yáintkiata. Túram nekasa nuja̱i̱ túrakum ayamprutkata.

²⁴ Uunt Yus winia Yusru Ame nekasa nuja̱i̱ métek túrutairmiji̱a̱i̱ íirsam nekarata. Tura nisha warartuscharti.

²⁵ Ní enentáimsaṉ chichartuiniak “¡Peṉké emeskatai tímiaj núchak yamaikia peṉké emeskajⁱ!” turutiara̱i̱ṉ.

²⁶ Winia yajauchirun warartuinia nu pachimprukarta túram natsan ajarti. Wiji̱a̱i̱ naṉkaamas enentáimtumainia nu pachimprukam natsan ajarti.

²⁷ Wi péṉker túramunam waitanentruinia nuka waras kantamáwarti. Tura Uunt Yus Ni takarniúri̱ aṉkant pujak shiir enentáimkiui nu aents iisar “Uunt Yus nekas shiir awajsamu atí” tuke tiartí.

²⁸ Tura winia iniai̱rja̱i̱ Ame péṉker naka túrutairmin chichastatjai tura tuke tsawant shiir awajtámtiatjai.