YKan. 34 - Yus Papí: Shuarja̱i̱ Yus Yamaram Chicham Najanamu

Ayamkartin Uunt Yus asamtai shiir awajeamu

Tawit kantamámu

¹ Uunt Yusa náari̱n tuke tsawant shiir enentáimtustatjai. Túrakun Ameketme péṉkeram tusan yawe̱tsuk kantampruáttajai.

² Wikia Uunt Yusan naṉkamantu enentáimtustatjai. Nuna nekaawar itiurchat pujuinia nusha warasartatui.

³ Ashí iruntrar Uunt Yus naṉkamantu awajsartai. Tura Ni náari̱sha shiir awajsartai.

⁴ Uunt Yus seam anturtukmai. Tura ashí sapijrui̱ya̱ aṉkant awajtúsmai.

⁵ Tuma ásar Uunt Yusan enentáimtuiniakka Ni kakarmari̱ji̱a̱i̱ tsáapin awajsamu áiniawai. Túruna ásar iniatsá̱rchamu ártatui.

⁶ Waitnenmainiaitiaj ju̱na untsumkui Uunt Yus anturtukmai. Tura tí waitsan kúntuts pujamunmaya̱ aṉkant awajtúsmai.

⁷ Kame nin umirkaru ainia núnaka Uunt Yusa suntari̱ ayamprúkar aṉkant awajénawai.

⁸ Uunt Yus nekas péṉkera nu atumsha nekapsa iistarum. Warí aents Niin enentáimiainia nuka shiir warasmin áiniawai. 1 Pit. 2:3

⁹ Yusna asarum tunaarinchatirmeka Uunt Yus ashamakrum umirkatarum. Warí Nin enentáimtuinia nuka atsumachartatui.

¹⁰ Kame úunt ya̱wa̱ uchirí̱sha yurumke̱ atsakuiṉkia tsukamainiak wáitniuiti. Antsu Uunt Yusan e̱a̱inia nuka péṉkera nuna peṉké atsumachartatui.

¹¹ Winia uchirtiram winirum anturtuitiarum Uunt Yus ashamakur itiur umirkatniuit nuna jintintiáttajrume.

¹² ¿Ya aentsua iwiaaku pujá nui̱ núkap tsawantan tura péṉkeran wáinkiatniun wakera?

¹³ Atumsha nu wakerakrumka yajauch chichatairmeka tura anaṉkartutairmesha iniaisatarum.

¹⁴ Yajauchinmaya̱ kanakrum péṉkera nuke túratarum. Nuyá̱ tuke imiatkincha pujustin wakeritiarum. 1 Pit. 3:10-11

¹⁵ Kame Uunt Yuska péṉker túrin ainia nuna wainiainiawai. Tuma asa ni seainia núnaka anturainiawai.

¹⁶ Uunt Yuska tuke yajauchin túruinia nuna kajerainiawai. Tuma asa nuka enentáimtushtai̱ árat tusa iwiaakmari̱n juruiniawai. 1 Pit. 3:12

¹⁷ Antsu Uunt Yuska péṉkeran túrin ainia nu wáitias kúntuts pujuiniak seainiamun anturak aṉkant awajniuiti.

¹⁸ Aents tunáa túramun nekaama tí kuntuts pujuinia nuna Uunt Yus tsaṉkurataj tusa tíjiu̱ch pujurui.

¹⁹ Péṉkeran túrin ainia nusha ti wáitsartatui. Túmainianak Uunt Yus ayamprúk aṉkant awajsártatui.

²⁰ Kame ni ukunchí̱ncha kupirkara̱i̱ṉ tusa wainiui. Tuma asamtai chikichkiksha kupirnakchartatui. Jiin. 12:46; Wek. 9:12; Jṉ. 19:36

²¹ Yusan umircha ainia nuka ni yajauch awajkartutairi̱ji̱a̱i̱ṉ mantamnattawai. Núnisaṉ péṉkeran túrinian nakitiáinia nusha sumamawartatui.

²² Ni takarniúri̱ ainia nuna Uunt Yuska uwemtikrattawai. Tuma asa ashí shuar Nin enentáimtus pujuinia nuka sumamachartatui.