YKan. 33 - Yus Papí: Shuarja̱i̱ Yus Yamaram Chicham Najanamu

Ashí najanin Yus shiir awajsatin

¹ Maa péṉker túrintirmeka Uunt Yusai̱ warastarum. Naka wekain ainia nuna shiir awajmari̱ṉkia nekas shíirmaiti.

² Ke̱e̱r tuntuiyarum Uunt Yus yumiṉsatai tura arpa neturmari̱ tias takakna nuja̱i̱ kantampruátarum.

³ Warasa shiir enentáimprarum neturmari̱ túntuiyakrum yamaram kanta kantampruátarum.

⁴ Uunt Yusa chichame̱ṉka nákaiti. Ashí Ni takatri̱ najanamu ainia nuka tímiatrusaṉ najanamu áiniawai.

⁵ Niṉkia nekasa nuja̱i̱ métek túrana núnaka tura naka túrin ainia nunasha aneawai. Uunt Yusa waitnenkartutairi̱ṉkia nuṉká piákuiti.

⁶ Uunt Yuska aya chichame̱ja̱i̱ṉ nayaimpinkia najankarmiayi. Ni wene̱ja̱i̱ umpuí Ni yáari̱n nekapmarchamniaitiatar ashí najankarmiayi.

⁷ Nayantsa entsari̱ṉkia irumpratniua nútikias íruawai tura nayantsa kunarí̱ṉkia ni pujutái̱ri̱ni̱ṉ ikiuawai.

⁸ Ashí nuṉka Uunt Yusnaka ashamkarti. Ashí nuṉká matsatrumna nú aentstirmeka ashamakrum tákeer ajatarum.

⁹ Warí Ni chichakmatai najanakarmai. Ni chichakmaja̱i̱ iruniarmai.

¹⁰ Uunt Yus uunt nuṉka mátsatka ainia nuna jintíamuri̱n peṉké ántar awajtúsuiti núnisaṉ aents niní̱ enentáimtumatairi̱ya nunasha Uunt Yus emestukaruiti.

¹¹ Uunt Yusa jintinkratmari̱ṉkia tuke iniaitsuk imiá nekas ártatui. Núnisaṉ Ni enentái̱ji̱a̱i̱ enentáimmiaka ashí atumí uchirí̱ṉsha tura tiraṉki̱ṉsha nuyá̱ tiraṉmia ímianaisha ártatui.

¹² Uunt nuṉka mátsatka ainia nuna Yusri̱ Úunt Yusaitkiuiṉkia nu shuar Níniua nútikias achikma nuka tuke péṉkeran nekapsar péṉker yumiṉkramuja̱i̱ shiir enentáimsamnia ártatui.

¹³ Uunt Yuska nayaimpinmaya̱n iimiui tura aentsu uchirí̱ncha ashí iyawai.

¹⁴ Ashí nuṉka matsatainia núnaka Ni pujutái̱ri̱ya̱ iyawai.

¹⁵ Ashí Ni enentái̱n najatawaru asa ashí Ni najankamuri̱nkia nékawai.

¹⁶ Úunt akupniuka untsurí suntarja̱i̱sha uwemchaiti núnisaṉ kakarma nuka ti kakarmaitiat niṉki pisarchamniaiti.

¹⁷ Kawaisha nupetmaktinniumka ántraiti. Ti kakarmaitiat niji̱a̱i̱ uwemprachminiaiti.

¹⁸ Uunt Yusa ji̱ṉkia Nin ashamainia nuna tura Ni waitnenkartutairi̱n nákainia nunasha wainiainiawai.

¹⁹ Tuma asa jatainmaya̱ ni wakaní̱n uwemtikrattsa tura tsukaisha iwiaakman susataj tusa túriniaiti.

²⁰ Ii wakaní̱nkia Uunt Yusan nákawai. Iin yáintmauka tura ii tantari̱ṉkia Níyaiti.

²¹ Tuma asamtai ii enentáiṉkia Nin waraawai, warí Ni naari̱ tunaari̱ncha nu enentáimtiniaitji.

²² Maa Uunt Yusá iiní̱ Ame waitnenkartutairam atí, Amiin nákajnia nuja̱i̱ métek.