YKan. 32 - Yus Papí: Shuarja̱i̱ Yus Yamaram Chicham Najanamu

Tunáa etsertumakrin tsaṉkurnamu

Tawit kantamtikiatniun áaruiti

¹ Shuar tunáa túramuja̱i̱ makumarminia̱ nu mash tsaṉkurnarainia nui̱ warasminiaiti.

² Shuar anaṉkartichua nu Uunt Yussha makuchmin asa warasminiaiti. Rum. 4:7-8

³ Tsawant takamtsuk winia tunaarun etsertumatsuk pujumiaj nuiṉkia uttsa pujakun ukunchtiuk jaa ajasmajai.

⁴ Warí, tsawai̱sha tura káshisha ame asuttiakmin kuku̱j esatái̱ ja̱ja̱tea áitkiarawakmin peṉké jata nekapmiajai. (Séraj)

⁵ Tura nuiṉkia winia tunaarun nuyá̱ yajauch túramun ishichkisha ú̱rtsuk ujakmajme. Nekas tunaarun Uunt Yusan ujaktájai tu enentáimsan ujakmajmena nui̱ winia ashí tunaar tsaṉkurturmame. (Séraj)

⁶ Tuma asamtai ámin enentáimturmainia nuka ti itiurchatnum pujuiniaksha tsaṉkurturai tusa seatmartatui. Tura nu itiurchatcha entsa ama̱a̱rak metsá ímiatmaksha warí itiurkashtatui.

⁷ Kame Ámetme winia ejamtair. Tuma asam tí waitias kúntuts pujusa̱i̱ṉ tusam waitkiattame. Tura aṉkant awajtúsam shiir waratáirmiji̱a̱i̱ tuke waramtikrustatme. (Séraj)

⁸ Péṉker pujustinian enentáimtikrattajme. Tura tuke íisnak péṉker wekasatniun jintintiáttajme.

⁹ Amesha yajasma ánin ántichu aip. Kame kawaisha nuíchuka umpurusha nawamkatai tusar kuntujnum jiṉkiar wenunam jiru ápchataiṉkiait. Warí nu túrachmaka áminkia weantúrmakchattawai. Ámeka tíiniuka aip.

¹⁰ Warí Yusan enentáimtichu ainia nuka ti wáitsartatui. Antsu Uunt Yusai̱ enentáimias pujuinia núnaka waitnentak péṉker wainiainiawai.

¹¹ Naka enentáimin asarum péṉker túrintirmeka atumí Uunt Yusri̱ wararkuram shiir enentáimtusrum kakaram kantampruátarum.