YKan. 30 - Yus Papí: Shuarja̱i̱ Yus Yamaram Chicham Najanamu

Yúmiṉkiakur Yus shiir awajma

Tawit kantamámu

¹ Maa Uunt Yusá winia iniantukim tura winia nemasur ainia nu wararsarat tusam tsaṉkatkacharu asakmin Amiin shiir awajsattajme.

² Uunt Yus winia Yusru Ámin untsukmajme tura tsuaramame.

³ Uunt Yusa winia wakaniur jaka matsamtainmaya̱ ji̱i̱rkimiame. Túram jaka iwiartai̱niam akaiki̱i̱ṉ tusam aṉkant awajtúsmame.

⁴ Ashí Yusna awajsamu árumna nu Uunt Yus kantampruátarum. Núnisrum Niṉkia nekas tunaarincha nu enentáimtusrum shiir awajsatarum.

⁵ Warí ni kajetáiri̱ṉkia wárik naṉkaamasminiaiti antsu Ni waitnenkartutairi̱ṉkia aents iwiaaku pujana ímianai awai. Kame útuka kashi takamtsuk útminiaiti tura tsawa̱a̱na nui̱kia warasminiaiti.

⁶ Tí peṉker pujakun wi chichaakun “Ju̱ya̱ṉka peṉké muchittianash muchitkiashtatjai” tímiajai.

⁷ Warí Ámeka Uunt Yusa Ame waitnentruram winia naintrui̱ kakaram ajas pujusat tusam túraitme. Túram Ame yapim ú̱kmame túrunawakmin nusháa enentáimpramjai.

⁸ Amiin Uunt Yusá untsuktatjame túran Uuntá seattajme.

⁹ Wi jakancha ¿warí peṉkerak ati? Tura jaka iwiartai̱nium wi jákaitkiuisha nui̱ṉkia nuṉká ju̱yu̱ri̱yash Ame náarmin ¿shiir awajsattuak tura nekasaitmena nunash etserturmaktatuak?

¹⁰ Uunt Yusá antukta túram winia waitnentrurta. Uunt Yus Ame winia yainniua nu ajatrusta.

¹¹ Wi útmarka jantsemátniunmaani̱ Ame yapajtiúrame. Útkur entsatái̱ pushikia jurutsám waratái pushí áentsrurume.

¹² Tuma asamtai winia wakantruka Ámin kantamprútmati tura takamat pujuschati. Uunt Yus winia Yusru tuke shiir awajtiatjame.