YKan. 3 - Yus Papí: Shuarja̱i̱ Yus Yamaram Chicham Najanamu

Yus enentáimtakur káshik seatin

Ni uchirí̱ Apsarúnai̱ya̱ pisar wekas ju̱ kantanka Tawit áaruiti.

¹ ¡Maa Uunt Yusá winia nemasrusha tí nukap kawentrukarai! Tura winia kajertuinia nuka untsurí áiniawai.

² Untsurí aents chichartuiniak “Yuska uwemtikrashtatui” turutainiawai. (Séraj)

³ Túrasha Ámeka Uunt Yusá tantara núnisam téntakam winia ejatkáme. Tura Ámeka winia tsáapnintruitme tuma asam wíniaka ikiakátme.

⁴ Uunt Yusrun yainkiai tusan seamjai túram Seun náinniumia̱ Ni náintri̱ya̱ nui̱ ái̱rkamai. (Séraj)

⁵ Warí Uunt Yus shiir waitiu asamtai tepesan kanarnash shintiarjai.

⁶ Tuma asamtai winia jatetkátaj tusar aents nekapmarchamnia téntatkarmataisha ashamkachartatjai.

⁷ Maa Uunt Yusru íirsam uwemtikrurta. Winia nemasur ainia nuka mishanam awatiáruitme túram Yusan enentáimtichu ainia nuna nai̱sha akararuitme.

⁸ Uwempratniuka Úunt Yusai̱ya̱iti. ¡Ame shuarum ainia nui̱ Ame péṉker yumiṉkrumka ártí! (Séraj)