YKan. 29 - Yus Papí: Shuarja̱i̱ Yus Yamaram Chicham Najanamu

Uunt Yusa winchari̱ tura kakarmari̱sha

Tawit kantamámu

¹ Kakaram árumna nuka Uunt Yus shiir awajsatarum. Uunt Yusa winchari̱ tura kakarmari̱ shiir awajsatarum.

² Uunt Yusa winchari̱ timiá shiira nuna tura imiankaska Ni naari̱ shiir awajsatarum. Uunt Yusa shíirmari̱nkia tunaaja̱i̱ mátrachu asamtai tikishmátratarum.

³ Uunt Yuska nayantsanmasha chichawiti. Yusa winchari̱nkia timiá shiira nuna ipiamtarui. Uunt Yuska untsurí entsa írunmanumsha pujuwiti.

⁴ Uunt Yusa chichame̱ ti kakarmaiti. Uunt Yusa chichame̱ṉka tujinchaiti.

⁵ Uunt Yusa chichame̱ sétruncha kúpiawai. Uunt Yuska Ríwianunmaya̱ sétruncha kupí kupí awajsaiti.

⁶ Tura Ríwianuncha waaka uchich étsekea awajmiayi. Tura Seriunnasha kampunniunmaya̱ waaka áishmaṉka nútikia nanten nanten awajmiai.

⁷ Uunt Yusa chichame̱ṉka ji akaam keana núnisaiti.

⁸ Uunt Yusa chichame̱ṉka kampuntin atsú nuṉkancha ukuráiniaiti. Núnisaṉ Uunt Yuska atsamunam Káatishan ukuráiniaiti.

⁹ Uunt Yusa chichame̱ṉka ensena numin peakaruiti tura aya jú̱nik ikiukniuiti. Tura Ni Uunt Je̱e̱n ashí Niniu ainia nu Ni winchari̱n shiir awajainiawai.

¹⁰ Uunt ama̱a̱ ama̱a̱rkamia nui̱sha Uunt Yuska tuke pujuyayi. Núnisaṉ Uunt Yuska Úunt Akupin asa tuke pujusmai.

¹¹ Uunt Yus niniu ainia núnaka ni kakarmari̱n súsartatui. Tura Uunt Yus niniu ainia núnaka tuke shiir pujustinnium péṉker yumiṉkrartatui.