YKan. 28 - Yus Papí: Shuarja̱i̱ Yus Yamaram Chicham Najanamu

Uunt Yuska seamunka ántawai

Tawit kantamámu

¹ Uunt Yusá, Ámin untsúajme. Winia úunt kayaru wíji̱a̱i̱ṉkia empekua núnikiaip. Winia ái̱rtsuk pujusakmin iwiarsamunam akainia wisha núnikia̱i̱j.

² Yusna akantúkma Je̱e̱mini̱ winia uwejrun takuitiaj nui̱ Ámin untsúajmena nuiṉkia wi seamu antukta.

³ Yusan enentáimtichu ainia nuja̱i̱ métek tura yajauchin túrin ainia núja̱i̱sha métek ji̱i̱ki̱ ajapkartuawaip. Ni írutramuri̱ji̱a̱i̱ niṉkia aṉkant atí tuíniawai tura yajauchikia ni enentái̱ya̱iti.

⁴ Ni takatrí̱ji̱a̱i̱ métek tura yajauch túrutai̱ji̱a̱i̱ métek súsarta. Tura ni takatrí̱ji̱a̱i̱ métek asutiáwarta.

⁵ Warí Uunt Yusa túramuri̱ncha Ni uwejé̱ja̱i̱ najanamunkesha enentáimtuscharmai. Tuma asamtai ni sá̱a̱ktiatui tura atakka je̱a̱mchattui.

⁶ Uunt Yus wi seammian antuku asa shiir awajsamu atí.

⁷ Uunt Yuska winia kakarmaruiti tura winia tantaruiti. Winia enentái̱rka Níniak enentáimtusmai tura yaintkiamai tura winia enentái̱run waramtikrusmai. Tuma asamtai kantampruán shiir awajsattajai.

⁸ Uunt Yuska Ni shuari̱ ainia nuna kakarmari̱nti. Utúachminia nuna uwemtikkiartutairi̱ṉkia Yusna atí tusar ukatkámu ainia núnaiti.

⁹ Ame shuarum uwemtikrata túram Ame achikma ainia nu péṉker pujut súsarta túram péṉker wáinkiarta túram tuke ayurawarta.