YKan. 27 - Yus Papí: Shuarja̱i̱ Yus Yamaram Chicham Najanamu

Uunt Yus winia tsáapnintruiti tura uwemtikriniaiti

Tawit kantamámu

¹ Uunt Yuska winia tsáapnintruiti tura winia uwemtikriniaiti. Túmanash ¿yanak ashamkataj? Uunt Yuska utúachmin wenuke péṉker iwiarturma asa winia iwiaakmaruiti. Tuma asan wisha ¿yanak ashamkaintiaj?

² Maṉkartin ainia nu winia weantúrkarmai tura winia nemasur ainia nusha tsanumprutainia nuka tukumak iniarartatui.

³ Winia mantuataj tusar untsurí matsamkarmataish túrasha winia enentái̱rka nunasha ashamkashtatui. Kame winia mantuataj tusar mesetan jurutsachartimpiash túmaitkiuisha wikia Yúsnak enentáimtú pujuttajai.

⁴ Uunt Yusan chikichkiniak seajna nuna e̱a̱ktatjai. Wi Uunt Yusa Je̱e̱n iwiaaku pujajna ju̱i̱ ashí tsawant tuke pujusmij tura nui̱ Uunt Yusa shíirmari̱n tuke iisan nekaamij tusan wakerajai. Túran ni Uunt Je̱e̱n Nin tí enentáimtusan pujursaintjiai.

⁵ Kame wáitsatin tsawant átatna nuiṉkia Ni pujamunam wíniaka u̱rak apujtus waitkiattawai. Tura Ni Je̱e̱ aṉkanta nui̱ u̱u̱k apujtustatui. Nuní̱ túruta wíniaka kátsuram kayanam yakí̱ apujtustatui.

⁶ Antsu nuiṉkia winia nemasur téntatruk pujurtuinia núnaka paṉkái̱ iisan wáinkiartatjai. Tura wikia Ame Shiir Awajtai̱ Je̱e̱min Ámin ti wararkun taṉkú maan áestuattajme. Nuya̱ṉka Uunt Yusan ti wararsan kantampruáttajai.

⁷ Maa Uunt Yusá, Ámin untsúajmena nui̱ anturtukta. Túram winia waitnentruram ái̱rkata.

⁸ Winia enentái̱r chichartak Ni yapi̱n íirsataj tákumka e̱a̱ktá turutjanta. ¡Maa Uunt Yusruá Ame yapimin e̱a̱ktájai!

⁹ Ame yápimkia wíniaka ú̱rtukaip. Ame takartámin kajerkam akankaip. Ámeka winia yáinniuitme. Tuma asam winia uwemtikrin Yusru ajapa ikiurtásh ikiurkim iniaitiusaip.

¹⁰ Kame winia aparsha tura nukursha ikiurkichartimpiash túrasha wíniaka Uunt Yus weṉkuras waitkiattawai. Isa. 49:15

¹¹ Winia nemasrui̱ya̱ naka jintianmaani̱ juruktia. Túram Uunt Yusá Ame jintim nekaprutáta.

¹² Winia nemasur wakera nui̱ íktusam iniaitiusaip. Winia kajertuinia nuka ántar chichainiawai tura ni chichame̱ aya yajauchik piákuiti.

¹³ ¡Nuṉká pujajnia ju̱i̱ Uunt Yusa waitnenkartutairi̱n íistiniaitjiai tu enentáimsachuitkiuiṉkia winia mayai̱r ashinkia̱a̱yi!

¹⁴ Uunt Yus shiir enentáimtusam nákasta. Túram enentáim ikiaká̱rta. Ee, nekas Uunt Yus nákasta.