YKan. 26 - Yus Papí: Shuarja̱i̱ Yus Yamaram Chicham Najanamu

Esetar wekainiana nuna seamuri̱

Tawit kantamámu

¹ Uunt Yusá nekasa nuja̱i̱ métek túrin awajtusta, warí wikia esetrar wekasatniunam wekasaitjiai. Núnisnak Uunt Yusan titiaraktak ajatsuk enentáimtusuitjiai.

² Maa Uunt Yusá íirsam nekaprusta winia enentái̱rsha tura winia enentáimtai̱rsha imiatkincha awajtúrsata.

³ Warí Ame aneṉkrattairmeka wini̱ni̱ṉ awai tura péṉker jintimín wekaajai.

⁴ Shuar yajauch chichamtin ainia núja̱i̱sha pujuschaitjiai núnisnak wáitian wáitrin ainia núja̱i̱sha tsaniṉchaitjiai.

⁵ Yajauch shuar ainia nu iruntai̱nmasha nakitiajai tura Yusan umircha ainia núja̱i̱sha peṉké pujuschaitjiai.

⁶ Winia uwejrunka nijiamaran tunaarincha awajsaitjiai. Nuní̱ túran Uunt Yus áestutairmi yantamén wekasattajai.

⁷ Yumiṉsajme tusan untsumkan ántumtikiattajai túran ashí aents túrachmin túraitmena nuna áujmattsattajai.

⁸ Maa Uunt Yusá Ame pujutai̱ je̱e̱min aneawitjiai Ame wincharum pujutai̱ je̱a̱ nuṉke̱n.

⁹ Yajauch shuarja̱i̱ métek winia jurukip. Shuar maṉkartin ainia nui̱sha winia iwiaakmar ikiurtusaip.

¹⁰ Ni uwejé̱nka nuna itiurchat awai tura untsuur uwejé̱nka akikiar útsukma áiniawai.

¹¹ Tura wikia esetran winia wekatairui̱ni̱ṉ wekasattajai winia waitnentruram awaṉtuktia.

¹² Wikia tuke péṉkernak túriniaitjiai. Uunt Yusan iruntramunmasha shiir awajsattajai.