YKan. 25 - Yus Papí: Shuarja̱i̱ Yus Yamaram Chicham Najanamu

Wáitsar pujakur yaintkiat tusar seamu

Tawit kantamámu

¹ Uunt Yusá winia wakantrunka Ámin íktajme.

² Winia Yusru Ámin enentáimta asan natsan awajit tusam iniaitiusaip ántsaṉ winia nemasruka warartuscharti.

³ Ti nekas Ámin enentáimturmainia nuka chikichkisha peṉké natsa̱a̱rchartatui. Antsu peṉké ántar Amiin kajertamainia nuka natsa̱a̱rartatui.

⁴ Maa Uunt Yusá Ame jintim jintintruata. Túram Ame jintim iniaktursata.

⁵ Winia uwemtikrin Yus asam péṉkeran túrataj ewekátsam jintintruata. Tsawant takamtsuk Ámin nákasmajme.

⁶ Maa Uunt Yusá Ame waitnenkartutairmeka náṉkatkachu áiniawai. Tuma asamtai Ame waitnenkartiniaitmena nuja̱i̱ enentáimturata.

⁷ Wi natsa asanak tunáa túramiaj nusha tura umikchatin enentáiji̱a̱i̱ pujumiaj nusha enentáimtursaip. Ame waitnenkartutairmiji̱a̱i̱ métek winiasha Uunt Yusá Ame tí peṉker asam waitnenkartutairmiji̱a̱i̱ enentáimtursata.

⁸ Uunt Yuska péṉkeraiti tura nákaiti. Tuma asa yajauch shuar ainia núnaka jintian nekaprua ininiuiti.

⁹ Péejchach ainia núnaka péṉker túrutainmaani̱ ewekásartatui núnisaṉ imianchach ainia núnaka ni jinti̱n wekasatniun unuiniarartatui.

¹⁰ Uunt Yusa jintí̱ ainia nuka waitnenkartutairi̱sha tura nekasa nuja̱i̱ métek áiniawai. Kame chícham najanamun tura akupkámun umirainia núnaka Yus nékainiawai.

¹¹ Uunt Yusá Ame náarmin arantin árat tusam winia tunaar tí nukap irunainiaiṉᵏⁱ tsaṉkurturta.

¹² Ya áishmaṉka Uunt Yusan ashama núnaka jú̱ jintia achikta tusa jintintiá ininiawai.

¹³ Nu áishmaṉka wakaní̱ṉkia péṉker pujustinnium ayamprattawai. Tura ni shuari̱nkia nuṉka sunastatui.

¹⁴ Uunt Yusan nekas ashamak tsanias pujana nuna Yus nekaska Ni enentáimta nuna nékamtikiattawai.

¹⁵ Winia jí̱runka Uunt Yusai̱ Níni̱ṉ tuke íimiak áiniawai. Kame Níyaiti winia nawerun nekanmaya̱ jurutna nuka.

¹⁶ Íirsam winia waitnentrurta. Wáitiayatnak wiki pujajai.

¹⁷ Winia enentái̱r jakamnia nekapeamunmaya̱ nu arant ajasjai. Tura jata nekapeaj nuyá̱ jurusta.

¹⁸ Winia wáitiamursha tura winia takatrusha iistá túram ashí winia tunaar tsaṉkurturarta.

¹⁹ Winia nemasrusha urutmá nukapea kawentrukara nu íisaria. Ti kajertuku ásar peṉké nakitruiniawai.

²⁰ Winia wakaniur waitrukta túram aṉkant awajtusta. Wi natsa̱a̱ra̱i̱j tusan Ámin ejamkájai.

²¹ Esetrar wekasatin tura naka túrutai̱sha wíniaka wáitkiarti. Warí wikia aya Amiiniak nákasjame.

²² Israer shuar jakamnia nekapena nuyá̱ awakearta Yusá.