YKan. 21 - Yus Papí: Shuarja̱i̱ Yus Yamaram Chicham Najanamu

Nemasnumia̱ aṉkant awajkartusu asamtai Yus shiir awajma

Ju̱ kantan Tawit kantamtikniun áatraiti.

¹ Jiuwaá úunt akupniuka Ame kakarmarmi̱i̱n enentáimturmas waraawai. ¡Tura Ame uwemtikkiartutairmin enentáimtus urutmatsuk warartama!

² Akupniu enentái̱ wakeramu Ame súsaitme tura ni seatmana nuka suritkiachmame. (Séraj)

³ Tí shiir enentáiji̱a̱i̱ iṉkiuṉtajtsam weriniaitme. Túram tawasap péṉker kuriji̱a̱i̱ najanamu etseṉkrumtikiamame.

⁴ Iwiaakman seatmakui tí nukap tsawant pujutai̱ súsaitme tura jáchatai̱ tuke pujutai̱ susamame.

⁵ Aents Ame uwemtikkiartutairam susam arantumai̱ awajsaitme tura naṉkamantu péṉker enentáimtutai̱ awajsámame.

⁶ Péṉker yumiṉji̱a̱i̱ tuke shiir awajsaitme túram Ame pujurkum waramtiksame.

⁷ Úunt akupniuka Jiuwá nekas enentáimtawai tura Ashí Naṉkamantu waitnenkartutairi̱nkia peṉké umuchkiachmin átatui.

⁸ Ame uwejém ashí nemasrum ainia núnaka jeartiatui. Núnisaṉ Ámin nakitramainia nunasha untsuur uwejém jeariártatui.

⁹ Tura kajektintrum tsawantinkia Ame nemasrumka ji ti keek naṉkaamas tsuwé amúa nútikiattame. Nui̱ Jiuwá kajek nemasri̱n emesrartatui tura ji aesak amukártatui.

¹⁰ Nemasrumi uchirí̱ nuṉká matsatainia nuka emestukartatme. Tura ni wea uchirí̱ ukunam akiinkiartatna nusha nútiksamek amukártatme.

¹¹ Warí emestamkataj tusa chichaman jurutrámsarai. Tura Ámin emeskataj tusa chichaman jurutrámainiayat tujintramkartatui.

¹² Ame nemasrum yapiniam tukurtaj tusam tíshimkiuram iwiarattame. Túram úkumur ipisrartatme.

¹³ Jiuwáa, kakarmarmiji̱a̱i̱ Amek uunt awajmamsatá. Kantamátaji túrakur Ame kakarmaram ti shiir paant awajsattaji.