YKan. 20 - Yus Papí: Shuarja̱i̱ Yus Yamaram Chicham Najanamu

Nupetmaktai tusar Yus seamu

Ju̱ kantan Tawit kantamtikniun áatraiti.

¹ Jiuwá wait ajá pujamin anturtamkati, tura Jakupa Yusri̱ naari̱ ayamprutmakti.

² Yus Shiir Awajtai̱ Je̱a̱nmaya̱ yaintmakti tura Seúnnumia̱ waitmakti.

³ Ame Yus susamu ana nuna kajinmáttsuk enentáimturti tura taṉku takamtsuk aestuamua nuna péṉkeraiti tití. (Séraj)

⁴ Ame enentáim wakerana nuja̱i̱ métek suramsati tura ame túratin enentáimtamna nunasha umirtamkati.

⁵ Ame uwemtikkiartutairmiji̱a̱i̱ iikia warastatji túrar ii Yusri̱ naari̱ pachisar tarach takuittiaji. Jiuwá ashí ame seamurmiṉkia umirtamkati.

⁶ Yamaikia nékajai Jiuwá Níniun anaikiamua núnaka uwemtikniuiti tura nayaimp Yusna akantúkma ana nuya̱ṉ ánturui nuya̱ṉka untsuur uweje̱ kakarmari̱ji̱a̱i̱ yáiṉtatui. Isa. 61:1; Ruk. 4:18

⁷ Kame chíkich ainia nuka mánitiai kárunak ti enentáimtuiniawai tura chíkichkia kawain ti enentáimtuiniawai. Antsu iikia ii Yusri̱ naari̱ Jiuwá enentáimtaji.

⁸ Tura niṉkia tikishi̱ ipijiátkam iniainiawai antsu iikia tariarar wajaji.

⁹ ¡Jiuwaá, uwemtikrata! tura Úunt Akupin ii untsuktatjinia nú tsawantinkia anturkartukti.