YKan. 19 - Yus Papí: Shuarja̱i̱ Yus Yamaram Chicham Najanamu

Yus najankamu tura Ni chichame̱

Kantamtikniun ju̱ kanta Tawit áaruiti.

¹ Yusa páantniuri̱ncha tura Ni najankar ikiusmancha nayaimpikia paant awajeawai.

² Ashí tsawantcha tura káshisha Yus ti uunta nuna aents nekaatniun jeainiawai.

³ Tura tui̱ shuar matsatainia ímianaisha Ni chichame̱sha ántunchiatan Ni páantniuri̱nkia nekamnia áiniawai.

⁴ Ashí nuṉkanam tui̱ shuar pujuinia tura nuṉka náṉkatramua ímianaisha Ni naṉkamanturi̱nkia wainiainiawai. Kame etsa̱nka nayaimpiniam ni pujutái̱ri̱n najata Yus ikiusuiti.

⁵ Kame étsa̱ka shuar ni je̱e̱ya̱ nuatnaikiatniuri̱n iṉkiuṉtaj tusa warawarat wéana núnis tura shuar tséketan unuimiátra waras tsékeana ánis ní jinti̱ni̱ṉ étsa̱ka warawarat tsékeawai.

⁶ Étsa̱ka nayaim náṉkatramunmaya̱ jiini̱ ataksha nayaim náṉkatkamunam waya̱a̱wai. Ni sukuachmaka chikichkisha peṉké atsawai.

⁷ Uunt Yus akupkámu chicham imiá péṉkeraiti. Tuma asa yamaram iwiaakman súramji. Uunt Yuska nekas ni tana nuna ímiatrusaṉ umin asa aents imian enentáimcha nuna neka awajeawai.

⁸ Kame Uunt Yus akupkámu umiktin chichamka nákaiti. Tuma asa shiir enentáimtikiartiniaiti. Nu akupkámu chichamka aya péṉkerkete tura tsáapninnium íimtinia núnis nekamtikiartiniaiti.

⁹ Uunt Yus ashamakur arantajnia nu yajauch túrashtinian tuke jintintramji. Tura ashí ni jintíamuri̱sha ímiatrusaṉ naka áiniawai.

¹⁰ Nu jintíamusha kuri wakerutaiya núja̱i̱sha naṉkaamas tura kuri péṉkeri̱ji̱a̱i̱ naṉkaamas wakerú ajataiti. Núnisaṉ chiní yumiri̱ji̱a̱i̱ naṉkaamas yuminiaiti.

¹¹ Akupkámu umiktin chichammiji̱a̱i̱ Ámin umirtamainia nu enentáimtikniuitme. Nu umikmaja̱i̱ péṉker átin sunasaruiti.

¹² ¿Yaki yajauch túramuri̱ncha niṉki nekaamawaint? Maa Uunt Yusru wi awajirman nekamatsjana nuya̱sha aṉkant awajtusta.

¹³ Ame takartámniusha naṉkamantu enentáimtumainia nu nupetkarat tusam tsaṉkatkaip. Túrutawakminkia yajauchinmaya̱ṉka takamtsuk aṉkant ajastatjai.

¹⁴ Winia uunt Kayar tura winia Uwemtikrin Uunt Yusru winia enentáimtai̱rsha tura chichamprusha ame iismasha shiir wakerú ajamai ártí.