YKan. 17 - Yus Papí: Shuarja̱i̱ Yus Yamaram Chicham Najanamu

Wáitsar pujutái̱nmaya̱ Yus ayamprutkat tusa seamu

Tawit ju̱ Yus seamu áaruiti.

¹ Uunt Yusá nekasa nuja̱i̱ métek túramua nu anturtukta. Tura wi seammasha antukta. Kame wi anaṉmatsuk untsúajam nu émamkesam anturtukta.

² Núnisaṉ wi yapajmiáktincha aminí̱ya̱ atí. Tura Ame jí̱mikia aya péṉkera nunak iistí.

³ Kame kashi iirsattsam tame winia enentái̱rsha émamkesam iirtusuume. Tura émamkesam iirsamsha yajauchikia peṉké waitrukchame. Warí, wiki enentáimtumasan náṉkamsaṉka chichakchatjai tumamniuitjiai.

⁴ Tura chíkich aents túruinia nuya̱ṉka yajauch aentsu túrutairi̱niaṉka Ame chichammiji̱a̱i̱ wáinmamkajai.

⁵ Atajkintra̱i̱j tusan wikia Ame jintimíini̱ṉ wéajai.

⁶ Maa Yusá wíniaka anturta asakmin wikia Ámin untsúajme. Antú antut ajasam winia chichamprusha anturtukta.

⁷ Ámin nekas enentáimturmainiaka ni nemasri̱ya̱ Ame untsuurumji̱a̱i̱ uwemtikiainiame. Tuma asam Ame waitnenkartutairmijia̱i̱ aents túrachmin ainia nu iniakmasta.

⁸ Ame ji̱mi wáinmena ímiatrusam wáitkiata túram tí anenta asam atash uchirí̱n etektus pujurna nútiksam ú̱rkata.

⁹ Yusan enentáimtichu itiurchat awajkartin ainia nuna jí̱ya̱ṉka ú̱rkata. Tura winia nemasur mantuataj tusar téntatkarainia nuya̱sha wáitkiata.

¹⁰ Niṉkia ní machari̱ji̱a̱i̱ṉ machararai ni wene̱ja̱i̱ waantu enentáimtumainiawai.

¹¹ Yamaikia ii wekakámunam weantrarai, aju̱nmártai tusa iis pujurtamainiaji.

¹² Winia nemasruka úunt ya̱wa̱ kuntinia esái yuátaj tusa itiura, tura úunt ya̱wa̱ uchirí̱sha ú̱mak tepana núnis áiniawai.

¹³ Maa Uunt Yusru íisarta túram iṉkiunaiktaj tusam weritia túram tikishmamtikrarta. Ame puya̱rmiji̱a̱i̱ winia wakaniur Yusan enentáimtichu ainia nuyá̱ aṉkant awajtusta.

¹⁴ Uunt Yusá Ame uwejmiji̱a̱i̱ aya ju̱ nuṉkanmaya̱ nunak enentáimtin aents ainia nuyá̱ aṉkant awajtusta. Kame niṉkia núkap takurmakainiaksha ni uchirí̱sha núkap yurumá ejemararsha tura nuya̱sha uchichíri̱n kuítian ikiuráiniawai.

¹⁵ Antsu wikia Ame yapimin nekasa nuja̱i̱ métek íistatjai. Tura Ámiji̱a̱i̱ métektaku ajasan shintiaran warastatjai.