YKan. 16 - Yus Papí: Shuarja̱i̱ Yus Yamaram Chicham Najanamu

Nekas péṉker juurma sunastin

Tawit áaruiti.

¹ Yusá Amiini̱ṉ weantka asamtai peṉker wáitkiata.

² Maa, Yusá Áminiuketjai tájame. Ámiji̱a̱i̱ṉchuka péṉker átinkia peṉké atsawai.

³ Kame Áminiu íktusma ju̱ nuṉkanam pujuinia núnaka tí peṉker wekainiakui niṉkia ti wararainiajai.

⁴ Tura najanamu yusan wáurtusar enentáimtuinia nu ti wáitsartatui. Nu ántar yúsnaka taṉkú numpe̱nka wikia ukatrúkchartatjai. Tura náari̱ṉkisha pachitkiachartatjai.

⁵ Uunt Yusá surusuitmena nuka Ameketme. Kame Amiini̱ṉ shiir enentáimsatniusha surame tura winia nuka Amek wainme.

⁶ Waitnentruruitme. Túram tí peṉker pujustinnium tsaṉkatrúkuitme. Kame wi achiktiniaitjiana nusha imiá shiirmachiti.

⁷ Jintintra asamtai Uunt Yusan yúmiṉkiajai. Nuja̱i̱ kashi kánaj nui̱sha winia enentái̱rui̱ jintintrawai.

⁸ Wini̱ya̱ Uunt Yusan tuke émtikjiai. Warí, wini̱ya̱ eem wea asamtai peṉké nupettukchartatui.

⁹ Tuma asamtai winia enentái̱rja̱i̱ waraajai. Núnisaṉ warastin chichaman chichaajai. Tura aya̱shruja̱i̱sha imiatkinchanum pujustiniaitjiai.

¹⁰ Warí, winia wakantrusha jaka matsamtai̱niam tuke ikiurtuschattame. Tura Áminiu naka wekáa Tunaarincha aya̱shi̱nkia káurtin tsaṉkatkashtatme. Tur. 2:31; 13:35; 1 Kur. 15:4; 1 Pit. 3:18-19

¹¹ Tura iwiaaku átin jintia jintintruáttame. Kame Amiin pujustatna nuka ti warastatui. Nuyá̱ Ame untsuurumiini̱ṉkia tuke shiir pujustin awai. Tur. 2:25-28