YKan. 150 - Yus Papí: Shuarja̱i̱ Yus Yamaram Chicham Najanamu

Ashí mayatkatiram Uunt Yus shiir awajsatarum

¹ ¡Naṉkamantuitme Uunt Yusá! Ni Shiir Awajtai̱ Je̱e̱n Yus shiir awajsatarum. ¡Nuyá̱ Ni nayaimpiri̱n ti uunt tura tí kakaram ásarmatai Yuska shiir awajsatnuitrume!

² ¡Yus ni kakarmari̱ji̱a̱i̱ najanka ásarmatai shiir awajsatarum. Ni imiá uunt asamtai shiir awajsatarum!

³ ¡Kachu umpuakrum Yus shiir awajsatarum núnisrumek árpaja̱i̱sha tura ké̱e̱rja̱i̱sha shiir awajsatarum!

⁴ ¡Shakapja̱i̱ jantsemkum Yus shiir awajsatarum núnisrumek kitiarja̱i̱sha tura piṉkiuiji̱a̱i̱sha shiir awajsatarum!

⁵ ¡Tura jiru tsentsempat kakaram chichainiana nuja̱i̱ shiir awajsatarum tura jiru tsentsempatja̱i̱ tuntuiyarum shiir awajsatarum!

⁶ ¡Ashí mayatrumna nu Uunt Yus shiir awajsatarum! ¡Naṉkamantuitme Uunt Yusá!