YKan. 148 - Yus Papí: Shuarja̱i̱ Yus Yamaram Chicham Najanamu

Ashí najankamuri̱ Yusan shiir awajáiniamu

¹ ¡Jiuwá shiir awajtai̱ atí! Nayaimpinmaya̱tirmesha Jiuwá shiir awajsatarum núnisrumek yakiya̱tirmesha shiir awajsatarum.

² Ashí Yusa suntari̱ árumna nútirmesha Ni shiir awajsatarum, ashí Ni suntartirmesha Yus shiir awajsatarum.

³ Etsá̱ tura nantú shiir awajsatarum. Ashí yaa keen árumna nútirmesha Ni shiir awajsatarum.

⁴ Nayaimpir nayaimpitirmesha Ni shiir awajsatarum núnisaṉ nayaimp áawini̱ya̱ entsá Ni shiir awajsatarum.

⁵ Jiuwáa naari̱ shiir awajsatarum. Warí Ni chichaak ju̱ní̱ turunati takui̱ tímiatrusaṉ najanakmiayi.

⁶ Nusha tuke amuukashtin árat tusa Ni ashí najanamiayi. Tura nunasha yapaji̱áshtinian akupkámun ni umiktinian apujtusmiayi.

⁷ Nuṉkaya̱tirmesha tura nayantsanmaya̱ uunt yajasmatirmesha tura uunt wá̱a̱nmaya̱tirmesha Jiuwá shiir awajsatarum.

⁸ Núnisaṉ peemsha yumi kátsuram ajasusha tura michasha nuyá̱ yuraṉkim nuṉká utsantrumna nútirmesha Ni shiir awajsatarum. Uunt nase Ni chichame̱n umiria nusha Ni shiir awajsata.

⁹ Nuyá̱ naintcha naint tépeprasha núnisaṉ numí nere̱n ainia nusha nuyá̱ sétrusha,

¹⁰ kampunniunmaya̱ yajasma ainia nusha núnisaṉ taṉku ainia nusha japinias yujá ainia nusha, nanamtin áiniatirmesha Yus shiir awajsatarum.

¹¹ Nuyá̱ úunt akupniusha tura uunt nuṉka mátsatka ainia nusha nuṉkaya̱ uunt ainia nusha núnisaṉ jú̱ nuṉkanam akupin ainia nusha

¹² tura áishmaṉsha nuwa̱sha natsasha núnisaṉ úuntchisha ashí nuṉkaya̱ matsatutirmesha Jiuwá shiir awajsatarum.

¹³ Jiuwáa naari̱ shiir awajsatarum. Warí aya Niṉki naṉkamantu awajsamuiti tura Ni páantniuri̱ṉkia nayaimpinmasha nuṉkasha ashí awai.

¹⁴ ¡Ashí Nin nekas umirainia nuka Jiuwá shiir awajsarti! ¡Israer shuarsha Ni shuar ayamach pujuinia nuka Nin shiir awajsarti! ¡Ni shuari̱n kakarmari̱n súsaiti! ¡Jiuwá shiir awajtai̱ atí!