YKan. 147 - Yus Papí: Shuarja̱i̱ Yus Yamaram Chicham Najanamu

Yus ashí amaana nu yumiṉsamu

¹ Yusa naari̱ shiir awajsamu atí ii Yusri̱ kantamkur shiir awajsatniuka péṉkeraiti. Warí shiir awajkur kantampruátniuka wakerújamainti tura shíirmaiti.

² Uunt Yus Jerusaréṉkan je̱a̱mui. Israer shuar tsakiṉmakarma ainia nunasha írumui

³ tura enentáinium jaa ainia nunasha tsuáwiti tura akaṉmári̱ncha jaanchji̱a̱i̱ pénuiniaiti.

⁴ Yaancha nekapmawiti tura ni náari̱n anaiyawai.

⁵ Ii Yusri̱nkia úuntaiti tura ti kakarmaiti tura Ni enentáimtairi̱nkia náṉkatkachuiti.

⁶ Uunt Yus péejchachin yáiniaiti tura Yusa umircha ainia núnaka nuṉká aju̱a̱nt péejchach awajniuiti.

⁷ Uunt Yus yumiṉsajme tusar túrutai̱ji̱a̱i̱ kantampruata nuyá̱ ii Yusri̱ṉkia árpaja̱i̱sha kantampruata.

⁸ Níyaiti nayaimpin yuraṉmiji̱a̱i̱ nukúana nú tura nuṉká yumi yutuktinniasha Niṉki íwiarui. Núnisaṉ naint tépepra ainia nui̱sha nupa̱n tsapamtikiui.

⁹ Taṉku ainia nunasha núnisaṉ shanashná uchirí̱ útainiakuisha áyureawai.

¹⁰ Warí, Yuska kawái kakarmari̱n tiikia enentáimtichiuiti núnisaṉ áishmaṉka kakarmari̱ncha wararchaiti.

¹¹ Antsu Nin ashamainiana nuja̱i̱ Uunt Yus waraawai tura Ni waitnenkartutairi̱n nákainia nuna enentáimtuiniawai.

¹² Maa, Jerusaréṉká Uunt Yus shiir awajsata. Núnisaṉ Seuná ame Yúsrum shiir awajsata.

¹³ Ame wáitirmi jirurí̱sha kupiniakchamnia awajtúsuitme. Ame uchiram Ámiji̱a̱i̱ init pujuinia nusha shiir pujut súsaitme.

¹⁴ Ame nuṉkemka aṉkant pujustin itiarniuitme túram péṉker tríkiuja̱i̱ tí nukap nútsumtikraitme.

¹⁵ Ni chichame̱n nuṉká akupeawai tura ni chichame̱nka tí warik wéawai.

¹⁶ Urea nútikia michan ikiuawai tura yuṉkunmia nútikia michá ju̱yu̱ri̱n ukatak sanamtikiui.

¹⁷ Ni michari̱n paṉka ju̱yu̱ri̱ya̱ nútikia ajapui. ¿Yaki ni tsetsekrí̱ncha wajawaint?

¹⁸ Ni chichame̱ akupkam kuawai. Ni naseri̱n umpuakui entsa ajawai.

¹⁹ Ni chichame̱n Jakupan paant awajtúsuiti. Ni akupkámu umiktinian tura nekasa nuja̱i̱ métek jintíamuncha Israeran nékamtikiamiayi.

²⁰ Chíkich nuṉka úunt matsatka ainia nuiṉkia jú̱ni̱ṉkia peṉké túrachuiti tura Ni nekasa nuja̱i̱ métek jintíamuri̱ncha nekacharuiti. ¡Naṉkamantuitme Uunt Yusá!