YKan. 146 - Yus Papí: Shuarja̱i̱ Yus Yamaram Chicham Najanamu

Aṉkant ajasár Uunt Yus shiir awajma

¹ ¡Naṉkamantuitme Uunt Yusá! Winia wakantru Uunt Yus shiir awajsata.

² Kame wi iwiaakjana ju̱i̱ṉkia Uunt Yusan shiir awajsattajai túran winia Yúsrun pujajna ju̱i̱ṉkia kantampruáttajai.

³ Ju̱ nuṉkanmaya̱ akupin ainia nu enentáimtutsuk aentsush enentáimturairap kame niinkia uwemtikkiarturtin atsawai.

⁴ Tuma ásar aents jákaṉka nuṉká ataksha waketainiawai túrunawar ni túratin iwiaramuncha nú tsawantini̱ṉ umitsuk ikiuawai.

⁵ Jakupa Yusri̱n enentáimta nú aentsnaka Uunt Yus yaya̱kui nekas shíiraiti. Kame Uunt Yus yaintkiat tusa nákasminiaiti.

⁶ Warí Uunt Yuska nayaimpincha nuṉkancha nayantsancha tura ashí nui̱ warí írunna núnaka Ni najankamu áiniawai tura nekasa núnaka tuke wáinniuiti.

⁷ Wáitkiasma pujuinia nunasha niṉkia ashí núnisaraṉ nekasa nuja̱i̱ métek túriniaiti. Tura tsukamainia nunasha yurumkan suawai. Uunt Yuska chíkich nuṉkanam achirar yaruakma ainia nunasha aṉkant awajniuiti.

⁸ Uunt Yuska kusurú ainia nunasha íimtikniuiti. Uunt Yuska kakarmachu ainia nuna inianniuiti. Uunt Yuska péṉker enentáimkia ainia nuna anenaiti.

⁹ Uunt Yus yajaya̱ aents pujana nuna wainiui tura mitiaikiancha tura waje̱ncha achíakui. Antsu Yusan umircha ainia nuna wekaamuri̱nkia emeṉkátui.

¹⁰ Uunt Yus tuke akuptiatui. Maa, Seuná ame Yúsrum yamaisha tura ukunmasha tuke akupú pujutniuiti. ¡Naṉkamantuitme Uunt Yusá!