YKan. 145 - Yus Papí: Shuarja̱i̱ Yus Yamaram Chicham Najanamu

Uunt akupin Yus shiir awajeamu

Tawit kantamámu

¹ Úunt Akupin winia Yusru ti uunt naṉkamantu awajsattajme tura tuke iniaṉnatsuk Ame náarmin shiir awajtítiajme tajai.

² Túran tuke tsawant shiir awajsattajme. Tura Ámin tuke iniaṉnatsuk shiir awajtiatjame.

³ Kame Uunt Yuska imiá uunt asa shiir awajú ajataiti. Kame timiá uunt asamtai Ni péṉkeri̱ takamtsuk nekaachminiaiti.

⁴ Ame najankamiam núnaka ukunam pujuartatna nusha nuyá̱ ni tiraṉki̱sha tuke enentáimtin ártatui tura ame kakarmarmiji̱a̱i̱ najankaitmena nunasha áujmatiartatui.

⁵ Ame wincharmi shíirmari̱ tí naṉkamantua nuna tura Ame najankamuram íijata núurmincha enentáimtustatjai.

⁶ Ame kakarmarmiji̱a̱i̱ najanamiam nuna shuar wáinkiar áujmatiartatui tura Ame najanamun áujmatainiakui wisha núnisnak Yusru Ame ti úuntaitmena nuna pachisan áujmatsattajai.

⁷ Ame waitnenkartutairam ti uunta nuna enentáimtusar chichasártatui. Túmainiak Ame naka túrutairmin pachisar kantamprútmawartatui.

⁸ Uunt Yuska yáiṉkratniuiti tura katsuntniuiti. Wárik kajechu asa ti waitnenkartiniaiti.

⁹ Kame Uunt Yuska ashiji̱a̱i̱ péṉkeraiti núnisaṉ ashí ni najankamuri̱n waitnenkartutariji̱a̱i̱ wainiui.

¹⁰ Maa Uunt Yusá ashí Ame najankamu írunna nu Áminkia shiir awajtámsarti. Núnisaṉ Ámiji̱a̱i̱ wekainia nu áentsrum shiir awajtámsarti.

¹¹ Nisha Ame akupeamurmi shíirmari̱sha tura kakarmarmesha áujmatiarti.

¹² Túrawar Ame kakarmarmiji̱a̱i̱ najankaitmena nuna aentsun nekamtikiawartatui tura Ame akupeamuram ti naṉkamantua nuna winchari̱n áujmattsartatui.

¹³ Ame akupeamurmeka uwir uwir náṉkatkachuiti tura Ame kakarmarmeka ukunam matsamártatna ímianaisha nuyá̱ ni tiraṉki̱ ártatna ímianaisha Ámeka akuptiatme.

¹⁴ Kame kakarmachu ainia núnaka Uunt Yus émeteawai tura kijinia entsaakua núnis wáitkiasma pujuinia nunasha Ni ataksha ipiaṉkeawai.

¹⁵ Aminiak ashí shuar enentáimturmasar pujuiniawai. Túmainiakui ni yurumke̱ tuke tsawant suíniame.

¹⁶ Ashí iwiaakainia nu ayuram ejemamtikiainiame.

¹⁷ Uunt Yuska ashí Ni jínti̱nkia ímiatrus nákaiti tura ashí Ni najankamuri̱n waitnenniuiti.

¹⁸ Ashí untsuinia núnaka Uunt Yuska tíjiu̱ch pujurui. Kame ashí ti nekas untsuinia núnaka pujuráiniawai.

¹⁹ Kame Uunt Yusan ashamak enentáimtuinia núnaka ni wakeramun umirniuiti. Núnisaṉ yainkiai tusa untsumkuisha anturak uwemtikrattawai.

²⁰ Uunt Yus nu aentsun anea asa péṉker wainiui antsu Yusan umircha ainia núnaka ashí emeskattawai.

²¹ Wikia Úunt Yusrun shiir awajsattajai. ¡Ashí aya̱shtin árumna nu ni naari̱ péṉkera nuna iniaṉnatsuk tuke shiir awajsatarum!