YKan. 144 - Yus Papí: Shuarja̱i̱ Yus Yamaram Chicham Najanamu

Yus enentáimtakur waramu

Tawit kantamámu

¹ ¡Jiuwá winia uunt muchiṉkrua núnis asa shiir awajsamu atí! Mesetnum mániktinian winia uwejrun waumkas tura winia tsara uwejruncha juujut awajturui.

² Winia waitnentriniaiti tura Nisha utúachmin je̱a̱ núnisaiti. Winia wenuke iwiartukma asa nupetkachminiaiti. Niṉkia winia uwemtikriniaiti. Winia tantaruiti nekas enentáiji̱a̱i̱ Nin enentáimtusuitjiai. Nisha winia shuarun péṉker wainkiat tusa apujtusuiti.

³ Jiuwáa ¿aentsti Ame imiá enentáimtutai̱ átincha warimpiaitiajⁱ? ¿Aentsush warí uruku asamtai timiasha aneam?

⁴ Aentska ni iwiaakmari̱ṉkia umpuim mashit ajana núnis tura mikintra ántsaṉ wárik naṉkaamawai.

⁵ Jiuwáa nayaimp uraim akaikim naint antiṉta túram múkuint awajiarta.

⁶ Peem akuptúkarta túram tsakiṉmakarta. Tura naṉkiram keá akaketram sapijmiamtikrarta.

⁷ Yakiya̱ṉ Ame uwejém iwiaiṉkiam nayantsanmaya̱ jurusam uwemtikrurta. Tura chíkich nuṉkanmaya̱ aentsu uwejé̱ya̱sha aṉkant awajtusta.

⁸ Nú aentscha wene̱ja̱i̱ ántar chicháu áiniawai tura ni kakarmari̱ṉkia wait chicham áiniawai.

⁹ Yusá, yamaram kantan Ámin kantampruáttajme. Tuntuitiai̱ neturmaja̱i̱ tura tias neturmaja̱i̱ kantampruáttajme.

¹⁰ Úunt akupin ainia nusha nupetmakarat tusam Ame tsaṉkatme núnismek Ame takartámin Tawit mesetnumia̱ aṉkant awajsámame.

¹¹ Nékashtai aentsu uwejé̱ya̱ atantim aṉkant awajtusta. Ni wene̱ja̱i̱ chichainiakka aya wáitniak chicháu áiniawai. Tura untsuur kunturi̱n takuiniar umikchattiat nekas túrattajai tiniu áiniawai.

¹² Ii uchirí̱nkia natsamakar árak tí peṉker saṉkut tsakakua núnis ártí tura ii nawantri̱nkia úunt akupniu je̱e̱ pauri̱ nakumprar tí peṉker iwiartukar ukukma timianú shíirmach ártí.

¹³ Ii arakri̱ neré ikiutai̱ṉkia ashí araka nere̱ja̱i̱ pimiasuá wáinkiarti núnisaṉ ii nuṉke̱nka ii murikrí̱sha tí nukap nekapmarchamnia pampaṉkarti.

¹⁴ Núnisaṉ ii waakari̱ṉkia takatnumsha ti kakaram ártí. Ántsaṉ pepru wenuke̱n kakarmaja̱i̱ chiṉkiamusha tura jiinkimniasha atsutí. Tura páasanmasha charaatum ajamusha atsutí.

¹⁵ ¡Tura aents tímiatrus matsatuka Yus shiir awajsamu áiniawai! ¡Aentsu Yusri̱ Jiuwayaitkiuṉka aentsnaka Niṉki shiir awajénawai!