YKan. 143 - Yus Papí: Shuarja̱i̱ Yus Yamaram Chicham Najanamu

Aṉkant ajastin tura péṉker túratin nekaatin seamu

Tawit aarma

¹ Maa Uunt Yusru wi seajna nu antukta tura wi untsúajmena nusha anturtukta. Chichakma yapajtsuk uminiaitmena nu tura péṉker túrutairmiji̱a̱i̱sha ái̱rkata.

² Ame takarniuitjiamna ju̱ja̱i̱ sumamtikiatniunam pachitkiaip. Warí Ame aents iwiaakuka iisam chichaakum “Aentsú ámeka péṉker túriniaitme” nuka peṉké tichattame.

³ Winia nemasur pataturainia nuka nuṉká aju̱ntá najatainiawai. Túruta yaunchu jakaa matsatna nútikrua kirit tsuumainium apujtusarai.

⁴ Winia wakantruka initiaani̱ṉkia jakamnia nekapeawai tura enentái̱rka mayai̱ ishinkiamnia nekapeawai.

⁵ Tsawant yaunchu naṉkaamasu ainia nuna enentáimtiarmajai. Ashí Ame najankamurmincha tura Ame uwejmiji̱a̱i̱ najankamu irunainia nunasha enentáimtajai.

⁶ Amiini̱ winia uwejrun iwiaiṉkiajai tura nuṉka ju̱ju̱ptin entsan atsumana núnisaṉ wi Ámin atsumajme. (Séraj)

⁷ Maa Uunt Yusru wárik ái̱rkata. Winia wakantruka mayai̱r ishiniui. Ame yápim winia ú̱rtukaip nuiṉkia jákatniunam waya̱wa̱i̱j.

⁸ Ame waitnenkartutairmeka káshik antumtikrukta. Warí Ámin enentáimtajme. Wi tu jintianma wekasatniuitiaj nu jintintruata. Kame winia wakantrunka Amiini̱ enentáimtikrajai.

⁹ Uunt Yusru, winia nemasruinia̱ aṉkant awajtusta, warí Amiin úmkachjak.

¹⁰ Ame wakeramurmin túrataj jintintruata. Warí Ámeka winia Yúsruitme, Ame péṉker Wakanim nuṉka paka wéamunmaani̱ jurukti.

¹¹ Uunt Yusru, Ame náaram shiir atí tusam winia enentái̱r atak nekas iwiaaku awajtúrsata. Nekasa nuja̱i̱ métek túrutairmiji̱a̱i̱sha winia wakaniur jakamnia nekapeamunmaya̱ jurusta.

¹² Ame waitnenkartutairmiji̱a̱i̱ winia nemasruka mitia ajasártatui. Ashí winia nemasru wakaní̱ ainia nuka emesrarta, warí wikia Ame takarniuitjiai.