YKan. 141 - Yus Papí: Shuarja̱i̱ Yus Yamaram Chicham Najanamu

Ayamprútkat tusar Yus aṉkú seamu

Tawit aarma

¹ Maa Uunt Yusru, Ámin wi untsúajme nui̱ winia taruttiaj tusam wárik juiktiá. Tura wi untsumkuisha chichamur anturtukta.

² Wi seamusha Ame íismaka kuṉkuinia núnis ti shiir atí. Winia uwejur takuimiuka aṉkú taṉku maar áeseamua ímiatrus atí.

³ Maa Uunt Yusru, wikia chichaatsa̱i̱ṉ wenurka Ame waitrukta núnismek chichamprusha péṉker waitrukta.

⁴ Kame winia enentái̱r yajauchia nuna wakerukat tusam tsaṉkatrukaip. Tura aents yajauchin túrin ainia nuja̱i̱ aya yájauchiniak pujursa̱i̱ṉ tusam iniaitiusaip. Kame ni yurumkari̱ kunturmaitkiuisha nunasha yuruashtaj tajai.

⁵ Naka túrin shuar chichartuktaj tusa asutiakuiṉkia ti shiir yumiṉsaintjiai. Tura Yusan enentáimtichu kuṉkuin muukrui̱ ukattrurtaj túrutkuisha nakitráttajai. Antsu nu aents yajauch túramuri̱n Yus iistí tusan Yusan iniaitsuk seasan pujustatjai.

⁶ Ni chichamprin ainia núnaka kaya írunmanum jápanum ajapnawartatui. Winia chichamur nekasa nuna antukartatui.

⁷ Pukutái̱ji̱a̱i̱ nuṉka pukuam, nuṉka punaichukait núnisaraṉ ii ukunchí̱ṉkia jakaa matsamtainmaani̱ tsakiṉmakmaiti.

⁸ Tuma asamtai Winia Uunt Yusru winia jí̱ruka Áminiak íirmainiawai. Amiin ejameajai tuma asamtai winia enentái̱r ajapa ikiurtukip.

⁹ Wa̱a̱ táutriar ikiurtuinia tura yajauchin túrat tusa anaṉkruinia nuya̱sha péṉker wáitkiata.

¹⁰ Wikia uwempran aṉkant ajasan naṉkaikin, Yusan umircha ainia nuka ni neka aepsamunmaṉ nemakarti.