YKan. 140 - Yus Papí: Shuarja̱i̱ Yus Yamaram Chicham Najanamu

Uunt Yus péṉker waitkiat tusa seamu

Tawit kantamámu

¹ Uunt Yusru, yajauch awajkartin aents ainia nuyá̱ uwemtikrurta.

² Nusha ni enentái̱nkia yajauch ásar ashí tsawant aya émesmaktinniak áujmatin áiniawai.

³ Tura yajauch shuara chichame̱ṉka napí tséasri̱ya núnis najamin áiniawai. (Séraj)

⁴ Uunt Yusru, shuar aya emesmaktinian wakerin ainia nuyá̱ aṉkant awajtusta. Kame wi túramun emestuktaj tusa chichaman juruttsaru ainia nuyá̱ wáitkiata.

⁵ Warí, naṉkamantu enentáimin ainia nu shuar eṉkemkamtai yajauch awajtústaj tusa jintian akirturawarai. (Séraj)

⁶ Úunt Yusrun áujkun “Ámeka winia Yusur asakmin wi seajmena nu anturtukta” tímiajai.

⁷ Uunt Yusá, Ámeka winia uwemtikrin kakaram Yus asam mesetnum ejamtai̱rua núnisaitme.

⁸ Uunt Yusá, Ámin enentáimturmachu ainia nu ni wakeruiniamuri̱ tsaṉkatkaraip. Ni túrataj tuíniamusha peṉké suritkiarta. Túrachmaka naṉkamantu enentáimtumasara̱i̱ṉ. (Séraj)

⁹ Antsu wiji̱a̱i̱ iruntrar pujuinia ju̱sha yajauch awajtústaj tusa áujmatruinia nu íksaṉ niṉki yajauch awajmámkartatui.

¹⁰ Nu shuarnum ji keá aju̱ṉnartatui. Tura Yus jinium aju̱a̱waram nú wá̱a̱nmaya̱ peṉké jíinkichartatui.

¹¹ Esetar enentáimtsuk chichauka ju̱ nuṉkanam péṉker pujú áchattawai. Núnisaṉ emesmau shuar ainia núnaka ni yajauchiri̱n útsuktatui.

¹² Tura shuar wáitkiasma ainia núnaka Uunt Yus yaya̱wai núnisaṉ atsumainia nunasha ayampruiniawai, nuna nékajai.

¹³ Nekasaiti, péṉkera túrin ainia nuka ame náarmin shiir awajsártatui. Tura péṉker wekain ainia nuke Aminí̱ pujusártatui.