YKan. 14 - Yus Papí: Shuarja̱i̱ Yus Yamaram Chicham Najanamu

Yus ni shuari̱n ayamprawai

Kantamtikniun súak ju̱ kanta Tawit áaruiti.

¹ Aents netse ainia nuka “Yuska peṉké atsawai” tu enentáimiainiawai. Kame peṉké yajauch ajasáru ásar peṉké mui̱jmiainian túruiniawai. Yaaksha péṉkeran túrinkia atsawai.

² Kame Uunt Yus aentsun Winia nekara enentáimtursamniasha áwash tusa nayaimpinmaya̱ṉ íimiayi.

³ Antsu Yusai̱ya̱ kanakiar mash ti yajauch enentáintin ajasáruyayi. Kame péṉkera túrin chikichkiksha peṉké atsumiayi. Rum. 3:10-12

⁴ Tunáa takarin ainia nu umitmaktinian wakeruiniak shuar apatku yua nútiksaran Uunt Yusnaka páchitsuk wi shuaran amuinia nuna yajauch túramuri̱n ¿nékainiatsuatska? Nékainiajanta.

⁵ Antsu péṉkera túrin ainia nuja̱i̱ Yuska tuke pujuwiti. Tuma ásar yajauch shuar ainia nuka sapijmiainiak kuraṉkartatui.

⁶ Antsu wáitnenmaitirmin atumí chichame̱ wishikraruiti. Túmaitkiusha Uunt Yusai̱ weankattarme.

⁷ ¡Iisiá, Seúnnumia̱ uwemtikkiartin Israer shuaran aṉkant awajsaṉka peṉker ainti! Kame ni shuari̱ achirar yajá yaruakman Uunt Yus awakearmataiṉkia Jakupusha tura ni shuari̱sha warastin ártatui.