YKan. 135 - Yus Papí: Shuarja̱i̱ Yus Yamaram Chicham Najanamu

Yus tí uuntaiti tura najankamu yus peṉké antraiti

¹ Naṉkamantuitme Jiuwá ¡Jiuwá naari̱ shiir awajsamu atí! Jiuwá takarniutirmesha Ni shiir awajsatarum.

² Átum Jiuwáa Je̱e̱n takarin pujatirmesha ii Yusri̱ Je̱e̱n á̱a̱ri̱n pujarmena nútirmeka Ni shiir awajsatarum.

³ Jiuwaka shiir awajsamu atí, warí, Ninkia ti péṉkeraiti Ni naari̱ pachisrum Yus kanta tampruátarum, warí Ninkia ti shiiraiti.

⁴ Jiuwá Jakupan Winia atí tusa anaiyak tura Israernaka Winia atí tusa achikmiayi.

⁵ Warí Jiuwaka ti kakaram arantumainti, wikia nuna nékajai. Ii Yúsri̱nkia ashí yus írunna núja̱i̱sha naṉkamas naṉkamantuiti.

⁶ Jiuwaka nayaimpinmasha tura nuṉkasha núnisaṉ nayantsanmasha tura ashí wa̱a̱ náṉkatkachu áiniana nui̱sha ni wakerana nuna túrawai.

⁷ Nuṉka náṉkatrana tímianaiya̱n yuraṉmincha takúawai. Tura yumi jámainiana péemniasha awajui núnisan nasencha ikiusma aan jíiniawai.

⁸ Ejiptunmaya̱ shuara uchirí̱ iwia̱i̱ri̱ iwiaakmari̱ncha Ni jurutkiarmai nuyá̱ ni taṉkuri̱ emka petsakarmancha núnisan túramai.

⁹ Ejiptuá, Parauṉkan nuyá̱ ashí ni takarniúri̱ncha aentsun enentáimtikrataj tusa aentsti túrachminian péṉker pujuschamnia iniaktustaj tusa aminii akuptúkarmiayi.

¹⁰ Untsurí nuṉka mátsatkamunam untsurí úunt akupin kakaram armia nunasha máwarmiayi.

¹¹ Amur shuara úunt akupniuri̱ Sejunan tura Pasannumia̱ úunt akupin Úknasha núnisan ashí úunt akupin Kanaannumia̱ncha máwarmiayi.

¹² Nu aentsu nuṉke̱n Yus Israer shuaran tuke niniu árat tusa súsarmiayi.

¹³ Jiuwáa Ame náarmeka náṉkatkachuiti. Áminkia yamaisha ukunmasha nuyá̱ ukunam akiiniawartatna nusha enentáimturmartatui.

¹⁴ Ti nekas ni shuari̱ ainia núnaka ni túramuri̱ji̱a̱i̱ métek akikiártatui. Jiuwá Ni takarniúri̱nkia waitnentrartatui.

¹⁵ Uunt nuṉka mátsatkamu ainia nuna najankamu yusri̱ṉkia winchá jiru tura kuri áiniawai. Nusha aents najankamu áiniawai.

¹⁶ Wene̱n takakainiawai túrasha chichainiatsui, ji̱sha awai túrasha wáinmainiatsui.

¹⁷ Kuishi̱ncha takakainiawai túrasha ántuiniatsui núnisaṉ wene̱nmaya̱sha mayainkia jiiniainiatsui.

¹⁸ Nuna najanainiana nusha niji̱a̱i̱ métek áiniawai tura ashí aents nekas enentáiji̱a̱i̱ nuna enentáimtuiniasha núnisan áiniawai.

¹⁹ ¡Israer shuartirmeka Jiuwá páantin naat awajsatarum! ¡Araun shuartirmesha Jiuwá páantin naat awajsatarum!

²⁰ ¡Riwí shuartiram, Jiuwá páantin naat awajsatarum! ¡Jiuwá ashamniutirmeka, Jiuwá páantin naat awajsatarum!

²¹ ¡Jiuwá Jerusaréṉnum pujana nú Seúnnumia̱ṉ shiir awajsamu atí! ¡Naṉkamantuitme Jiuwá!