YKan. 132 - Yus Papí: Shuarja̱i̱ Yus Yamaram Chicham Najanamu

Seun naint Yus tuke pujustin anaikiamu

¹ Ii Uunt Yusri̱yá, Tawit tura ashí ni wáitiamuri̱sha enentáimtusta.

² Kame Jakupa Uunt Yusri̱ Ashí Tujintkiachua nuna Tawitkia timiá nekas umiktatjai tusa chicharuk

³ “Yusa je̱e̱ je̱a̱mtinian wáintsukka winia je̱a̱rui̱ waya̱ṉkesha tura peakruí̱ṉsha tepesan ayamprashtatjai.

⁴ Tura kanartaj táyatnaksha ishichkisha kanarchattajai.

⁵ Aya Jakupan Uunt Yusri̱ Ashí Tujintkiachua nuna pujutái̱ri̱n wainkian ayamprattajai” tímiayi.

⁶ Nusha Épratanam itiaru tama antukmaji. Tura nusha Yaar kampunniunam wainkiamji. 1 Sam. 7:1-2

⁷ Ni Shiir Awajtai̱ Je̱e̱n waya̱wartai túrar ni pujutái̱ri̱n weantkarar tikishmátrartai.

⁸ Uunt Yusá, Ame kakarmaram iniakmatai̱ Aentsja̱i̱ Chícham Najanamu Eṉketái̱ya nui̱ wajakím ayamtai̱ pujutái̱rmin waya̱ta.

⁹ Áminiun pujurtamin ainia nuka péṉkeran tura naka túratniun iniakmasarti. Tura Ámin nekas umirtamainia nuka ti warasar kantamáwarti.

¹⁰ Ame takartámin Tawit anea asam anaikiamamna nu kajinmátkip. 1 Akup. 11:12-13,34; 15:4-5

¹¹ Uunt Yus nekas kajinmattsuk umiktatjai tusa Tawitian chicharuk “Amé weanak akupku pujutái̱rmin apujsartatjai.

¹² Ame uchirmesha Wi chícham najanamun tura winia chichamur umiktinian jintintjiarmena nunasha uminiakuiṉkia ni uchirí̱sha akupku pujutái̱rmin tuke pujusártatui” tímiayi.

¹³ Kame Uunt Yus Seun náintian ti wakeruk “Wi pujutai̱ atí” tusa anaikiamiayi.

¹⁴ Tuma asa chichaak “Wi aṉkant tuke shiir pujustinkia ju̱i̱ti. Warí, Wi wakeruku asan ju̱i̱ pujustatjai.

¹⁵ Túran warinmaksha núkap súsartatjai. Nui̱ṉkia kuítrinchasha yurumáwar nútsurartatui.

¹⁶ Núnisaṉ Wínian pujurin ainia nunasha naka wekasatniun unuiniarartatjai. Tura Winia nekas enentáimturainia nusha ti warainiak kantamáwartatui.

¹⁷ Nui̱sha Tawitia kakarmari̱n iwiainiaktatjai. Kame Wi anaikiaitiaj nu tsáapninia núnis paant ajastinian iwiarturuitjiai.

¹⁸ Ni nemase̱ ainia núnaka iniatsá̱rartatjai antsu niinkia shiir awajsan úunt akupin awajsattajai” tímiayi Uunt Yus.