YKan. 130 - Yus Papí: Shuarja̱i̱ Yus Yamaram Chicham Najanamu

Uunt Yus Israeran aṉkant awajsattawai

¹ Maa Uunt Yusá, takamtsuk meṉkakamnianum pujusan Ámin untsúajme.

² Uunt Yusá, winia chichamur antukta, tura wi untsumma antuktaj tusam antú antut ajasam pujusta.

³ Maa Uunt Yusá, tunáa tuke enentáimtusam pujuwitkiumni̱ṉkia, maa Uuntá ¿yaki naka wajasaint?

⁴ Túrasha Ámeka tsaṉkukratniuitme, shiir awajtai̱ ámij tusam túriniaitme.

⁵ Wi Uunt Yusan nákajai, tura winia wakantrusha núnisaṉ nákawai. Wi Ni chichame̱n enentáimtamurnaka ikiusjai.

⁶ Kame jintia iistá tusar awajsámuja̱i̱ naṉkaamas winia wakaniur Uunt Yusan nákawai, ee jintia iin káshik wajana nuja̱i̱ naṉkaamas nákawai.

⁷ Maa Israerá, ame enentáimmiarmeka Uunt Yusai̱n ikiusta. Warí, Uunt Yuska waitnenkartiniaiti tura Niinkia tí nukap aṉkant ajastin awai.

⁸ Uunt Yus Israernaka ni tunaarí̱ya̱ aṉkant awajsártatui.