YKan. 116 - Yus Papí: Shuarja̱i̱ Yus Yamaram Chicham Najanamu

Jákatniunmaya̱ waitnentrar aṉkant awajsamu

¹ Winia chichampruncha wi seamuncha anturtuku asamtai Jiuwan aneajai.

² Ni kuishi̱ji̱a̱i̱ winia anturtuku asamtai wi iwiaaku pujuttajna nuiṉkia ashí tsawant yaintkiai tusan untsú wétatjai.

³ Jatai̱ jiṉkiata penuntramai. Jákaar iwiarnastinian ishichik ajasu nekapeakun tí waittsamjai. Wisha jakamnia nekapeakun najaimiatai̱n wainkiamjai.

⁴ Nuiṉkia Jiuwáa náari̱n pachisan untsúakun “Jákatniunmaya̱ uwemtikrurta Jiuwáa” tímiajai.

⁵ Jiuwá waitnenkartiniaiti tura nákakea nunak túriniaiti. Ee nekas ii Yúsri̱nkia tí waitnenkartiniaiti.

⁶ Jiuwaka imianchach ainia nuna wáinniuiti. Wi tí jaa pujái̱ péṉker awajtúsmai.

⁷ Winia enentái̱ru tee ajasam asata. Warí, Jiuwaka wíniaka péṉker awajtiniaiti.

⁸ Maaj, jákatniunmaya̱ṉka amek winia wakantruka uwemtikraitme. Winia útmarsha amek atsaṉturuitme núnismek winia nawersha tukumkat tútsuk wáitkiaitme.

⁹ Tuma asan ju̱ nuṉkanam pujuttajna nui̱ṉkia Jiuwá wakeramun turú pujuttajai.

¹⁰ Nekas enentáiji̱a̱i̱ enentáimta asan ti wáittsan pujayatnak etserkamjai.

¹¹ Tura waur enentái̱rja̱i̱ “Aentska ashí wait áiniawai” tumammiajai.

¹² Ashí winia waitnentrurua nunasha ¿Jiuwancha wariniak akiktaj?

¹³ Yusan ántrar súsatniua nútiksanak uwemtikruru asamtai yúmiṉkiakun uwemtai̱ piniṉkian takuittiajai. Túran Jiuwá náari̱n pachisan untsuktatjai.

¹⁴ Jiuwan ashí Ni shuari̱ ainia nu iimiainiamunam nekas umiktatjai tímiaj nuna umirkattajai.

¹⁵ Jiuwá Niniu ainia nuna jáakuisha waitnentak ti kúntuts enentái eṉkemtawai.

¹⁶ Jiuwáa wikia ti nekas Ame takarniúrmetjai. Ame iniatairmetjai núnisaṉ winia nukur Ámin takartámniua nuna uchirí̱ntjiai. Wi jiṉkiantrámunmaya̱sha Ame atitramame.

¹⁷ Ámin shiir awajeakun taṉkun maan aestuattajme túran Jiuwá náari̱n untsuktatjai.

¹⁸ Jiuwan ashí Ni shuari̱ ainia nu iimiainiamunam chicharkun shiir awajkun nekas umiktatjai tímiaj núnaka yamái umirkattajme.

¹⁹ Tímiaj núnaka Jiuwá Je̱e̱ á̱a̱ri̱n Jerusaréṉka ajapéri̱n umiktatjai. ¡Jiuwá shiir awajtai̱ atí!