YKan. 115 - Yus Papí: Shuarja̱i̱ Yus Yamaram Chicham Najanamu

Uunt Yus tura najankamu Yus

¹ Maa Uunt Yusá iinkia atsá kame iinkia atsá antsu Ame náaram shiir awajsata. Ame waitnenkartutairmiji̱a̱i̱ tura Ame nekasaitmena nuja̱i̱ túrata.

² Uunt nuṉka mátsatka ainia nusha ¿urukamtai Ame Yusrumsha yamaisha tui̱ pujá tiarat?

³ Warí ii Yusri̱ṉkia nayaimpiniam pujawai tura najanatniun wakerimia núnaka najankaiti.

⁴ Ni aents najanamu yusri̱ṉkia kuri tura kuit jiru áiniawai. Aents uwejéja̱i̱ najankamu áiniawai.

⁵ Wene̱ncha takakainiawai túrasha chichachu áiniawai. Ji̱ncha achíakainiawai túrasha iimtsui.

⁶ Kuishin takakainiawai túrasha ántichu áiniawai. Nuji̱ncha takakainiawai tura nekapcha áiniawai.

⁷ Uwejé̱n takakainiawai túrasha takas íistinian nékainiatsui. Nawe̱n takakainiawai túrasha wekaicha áiniawai. Wene̱n takakainiawai túrasha chichachu áiniawai.

⁸ Najanin ainia nuka nuja̱i̱ métek áiniawai tura nin náṉkamas enentáimtin áiniawai.

⁹ Uunt Yus enentáimtusta Israerá. Ámin yáintmauka Níyaiti tura ame tantarumete.

¹⁰ Arauna shuari̱tirmeka Uunt Yus enentáimtustarum. Ámin yáintmauka tura ame tantarumka Níyaiti.

¹¹ Uunt Yus ashamniutirmeka Uunt Yus enentáimtustarum. Atumín yáintmauka Níyaiti tura atumí tantari̱nti.

¹² Uunt Yus iin enentáimturmasarji tura shiir pujutnum yumiṉkramprattaji. Israera shuari̱ncha péṉker pujutnum yumiṉkrartatui. Arauna shuari̱ncha péṉker pujutnum yumiṉkrartatui.

¹³ Uunt Yusan ashamin ainia núnaka péṉker pujutnum uchirí̱ncha tura úuntnasha yumiṉkrartatui.

¹⁴ Uunt Yuska nú nukap atumíncha tura atumí uchirí̱ncha péṉker pujutnum suramsarti.

¹⁵ Átum Úunt Yusnaitrumna nútirmeka shiir atarum. Niṉkia nayaimpincha nuṉkancha najankamai.

¹⁶ Nayaimpir nayaimpir Uunt Yusna áiniawai túrasha aentsu uchirí̱n nuṉkanka súsaiti.

¹⁷ Jákaru ainia nuka Uunt Yusnaka shiir awajáiniatsui. Chikichkisha jaka mitiatniunam akainia nusha tujintiainiawai.

¹⁸ Antsu iikia Uunt Yus shiir awajsatai. Yamaiya̱ ju̱yá̱ juárkimiuk tuke tsawant Uunt Yus shiir awajsatai. ¡Naṉkamantuitme Uunt Yusá!