YKan. 112 - Yus Papí: Shuarja̱i̱ Yus Yamaram Chicham Najanamu

Uunt Yusa umirainia nuna warastintri̱

¹ ¡Naṉkamantuitme Uunt Yusá! Aents Uunt Yusan arantúk umirna nu tura Ni akupkámuri̱n enentáimtuinia nuka warasarti.

² Tuma asa ukunam akiiniawartatna nusha kakaram ártatui. Tura péṉker enentáimkia ainia nuna tiraṉki̱ṉkia shiir awajsamu ártatui.

³ Ni warirí̱sha kuítri̱sha ni je̱e̱ṉkia írunui tura ni péṉker túrutairi̱sha amukashtatui.

⁴ Péṉker enentáimkia ainia núnaka tsáapin awajtawai. Tura péṉker waitnenkartin yáiṉkratniua nuka Níyaiti.

⁵ Péṉker enentáimtinian ikiattsata tutaikia waitnentar íkiawai. Ashí níniuncha tímiatrus péṉker wainniui.

⁶ Túramu asa atajkintrashtatui. Esetar túrin asamtai kajinmatkichma tuke enentáimtutai̱ átatui.

⁷ Tura yajauch chichaman antuksha ashamkashtatui. Warí, ni Uunt Yusri̱n tuke enentáimtus pujá asa sapijmiachuiti.

⁸ Kakaram enentáimin asa sapijmiachuiti. Tuma asa ni wakeramu ni nemasri̱ji̱a̱i̱ wáinmam nákastatui.

⁹ Atsumainia súsatniua núnaka ementutsuk súwiti. Tuma asa ni péṉker túrutairi̱sha peṉké amukashtiniaiti ántsaṉ ni kakarmari̱sha paant shiir awajsamu átiniaiti.

¹⁰ Antsu Yusan enentáimtichu ainia nuka nuna wáinkiar kajekar nai̱n kátetete awajainiak aya nunak enentáimiartatui. Tura Yusan enentáimtichu wakerutairi̱ṉkia amuukartiniaiti.