YKan. 111 - Yus Papí: Shuarja̱i̱ Yus Yamaram Chicham Najanamu

Yus Ni shuari̱n wainiui

¹ ¡Naṉkamantuitme Jiuwáa! Jiuwan enentái̱rja̱i̱ takamtsuk naka wekain ainia nu iruntramunmasha yumiṉsattajai.

² Jiuwá najantkamuri̱ṉkia ti shíirmach áiniawai tura nu wakeratikia unuimiatú ajamai áiniawai.

³ Ni najankamuri̱ṉkia shíirmach tura páantin áiniawai tura nekasa nuja̱i̱ métek túrutairi̱sha tímiatrusaṉ tuke awai.

⁴ Warí, aents túrachminian najantka núnaka peṉké kajinmatkichmin awajsaruiti. Maaj, Jiuwaka ti shiir ajawiti tura waitnenkartiniaiti.

⁵ Yusan ashamin ainia núnaka yurumkan súawai. Ni chichaman najanamia núnaka tuke enentáimtittiawai.

⁶ Ni kakarmari̱ji̱a̱i̱ túrinia nuna Ni shuari̱n iniaktak uunt nuṉka mátsatka armia nuna nuṉke̱n súsarmiayi.

⁷ Ni uwejé̱ja̱i̱ najankamuka nekas tura nekasa nuja̱i̱ métek áiniawai. Tura ashí Ni akupkámuri̱nkia tímiatrusaṉ áiniawai.

⁸ Nu akupkámusha nákak túratin ti nekasa nuja̱i̱ apujamuiti. Nusha amukashtin tuke apujsamuiti.

⁹ Ni shuari̱ emetamu pujuinian uwemtikrattsa akikmatkamiayi. Tura chichaman amukashtinian najanamiayi. Ni náari̱ṉkia Tunaarinchaiti tura tsuumai̱ arantumainti.

¹⁰ Nekas neka átinkia Jiuwá ashamamuja̱i̱ náṉkamui. Ni akupkámuri̱n ashí umiriainiana nuka tí peṉker neka áiniawai. ¡Yuska tuke shiir naat awajsamu átiniaiti!