YKan. 11 - Yus Papí: Shuarja̱i̱ Yus Yamaram Chicham Najanamu

Tawit itiurchat pujayat pisatsuk Yusan enentáimtamu

Kantamtikniun súak ju̱ kanta Tawit áaruiti.

¹ Uunt Yuska wi ejamtai̱ ai̱sha ¿itiurak winia chichartuiniak “Chiṉkich nainnium nanak u̱mna núnikta turutiarat?”

² Wats nekaata, Yusan enentáimtichu ainia nu ni tíshimkiuri̱n iwiararai. Túrawar nenak ú̱mpruk pujursar naka enentáimkia ainia nuna naṉkía tukutaj tusa naṉkin ikiusarai.

³ Aeprukmari̱ emestukmaitkiuisha péṉker túrin ainia nusha ¿warí itiurkaintiak?

⁴ Uunt Yuska Uunt Je̱e̱ akantúkma nui̱ pujawai. Uunt Yusa pujutái̱ri̱ṉkia nayaimpinmaiti. Tura Ni ji̱ṉkia aentsnasha tura aentsu uchirí̱ncha wainiainiawai.

⁵ Péṉker túrin ainia nuna Uunt Yuska nekapas iyawai. Tura yajauch shuar ainia nuna wakaní̱nkia nakitniuiti tura yajauchin turuujat nekapin ainia nunasha muí̱jniuiti.

⁶ Yusan enentáimtichu ainia nuna jinia kaí̱ri̱n núnisaṉ ji kean tura asuprin nuyá̱ kakaram nase iniantar ashí áeskartatui.

⁷ Uunt Yuska péṉkeran túriniaiti tuma asa péṉkeran anenaiti. Tuma asamtai naka enentáimkia ainia nuka Niji̱a̱i̱ métek íiniaisar pujusártatui.