YKan. 109 - Yus Papí: Shuarja̱i̱ Yus Yamaram Chicham Najanamu

Yapajtiúrkai tusa seamu

Tawit kantamámu

¹ Maa, Wi shiir awajtai̱ Yusá, takamat pujusaip.

² Kame Yusan enentáimtichu tura anaṉkartin ainia nusha kajertuiniak ántar áujmatrusaruiti.

³ Chichame̱ja̱i̱ muí̱jruinia asar wariṉkish túrachu ai̱ṉ wiji̱a̱i̱ mánaikiarai.

⁴ Wikia Yúsrun seá pujai̱ṉ wi aneṉkrattairnaka yapajtiuiniak sumamtikruawarai.

⁵ Péṉkerja̱i̱ yapajtiutsuk antsu yajauchiji̱a̱i̱ yapajtiúkarai. Túrutawar anentsuk muí̱jruiniawai.

⁶ Yusan enentáimtichua nu wajatki̱ kajerkati tura sumamtikiartinia nu untsuurí̱ni̱ pujusti. Sak. 3:1

⁷ Sumamtikiainia nuiṉkia makukratin ajasti tura ni seamainiamuk tunaaka awajsarti.

⁸ Ni tsawantri̱ ishichik tsawant atí tura ni takatri̱nkia chíkich jurukti.

⁹ Tura ni nuwe̱sha waje̱mati tura ni uchirí̱sha mitiaikiamkarti.

¹⁰ Tura ni uchirí̱ṉkia wekaikiní̱ ajasár seamkini̱ wekain ártí. Tura yurumkari̱nkia je̱a̱ emeskamunmaya̱ e̱a̱kar yujá ártí.

¹¹ Kuítian ikiamniua nú ashí ni takakna núnaka nérentin ajasti. Tura yajaya̱ aents ainia nu ni ajarí̱n nerea núnaka jurukiarti.

¹² Kame waitnenkartutai̱ takakuka atsutí. Núnisaṉ mitiaik ainia nuna waitnentramniaka atsutí.

¹³ Ni shuari̱ ainia nuka amú amusma ártí tura atak akiiniawartatna nuna náari̱ṉkia japiramu ártí.

¹⁴ Ni aparí̱ yajauch túrutai̱ armia nuka Uunt Yus pujamunam enentáimtutai̱ ártí núnisaṉ nukurí̱ tunaari̱ṉkia japirachma atí.

¹⁵ Antsu Uunt Yus pujamunam tuke eem pujú ártí. Tura ni nuṉká pujakui enentáimtin armia nuka japintrati.

¹⁶ Kame waitnenkartutai̱n iniakmastinian enentáimturchamai. Antsu kuítrincha atsuma nuna pataatuk mátniunam ejemai.

¹⁷ Ni yumiṉkrak yumiṉkrurarti timiai. Tura nu yumiṉ ukatramai tura péṉker pujutnaka nakitramai. Tuma asa níya̱ṉka kanakmiayi.

¹⁸ Kame yajauchiji̱a̱i̱ yumiṉkram pushí entsarua núnikmai. Nuyá̱ enentáiniam entsa núnis wai̱ntiati tura ukunchnumsha asuitia núnis wai̱ntiati.

¹⁹ Pushí nukúa nútikiati tura emenmamak tuke emenmamamua nútikiati.

²⁰ Winia sumamtikruinia nu yapajmiáktinkia winia wakantrun yajauch chichartuinia nuka Úunt Yusai̱ya̱ jú̱nis nekapsarti.

²¹ Maa winia Uunt Yusru Ame naarmi aneṉkrattairmiji̱a̱i̱ waitnentrurta. Túram aṉkant awajtusta. Ame waitnenkartutairmeka péṉkeraiti.

²² Wikia waitnenmaintjiai. Tuma asan atsumajai tura winia enentái̱rui̱ initiaani̱ṉkia akaṉmaitjiai.

²³ Mikintra ajakí̱ wéak urukniuit wisha núnisnak ajasjai. Tuma asan manchi pe̱a̱rar ajapatniua núnikjiai.

²⁴ Yurumtsuk ijiarmá asan winia tikishruka yajauch waintrukarai. Tura winia aya̱shrusha yurumak tátsam watsaki̱ wéawai.

²⁵ Wikia natsan awajtai̱ ajasmajai, iirsar muuke̱n pe̱a̱rarmai.

²⁶ Uunt Yus winia Yusru yáintkiata. Ame wakeram núnisam Ame waitnenkartutairmiji̱a̱i̱ uwemtikrurta.

²⁷ Maa Uunt Yusru Ame uwejmiji̱a̱i̱ ju̱ najankamamna nuna nekaawarti.

²⁸ Yumiṉkruinia nuka Ame shiir pujutnum yumiṉkrurta tura Ame takartámniuka waras pujái̱ niṉkia natsanmai̱ ajarti.

²⁹ Winia tsanumprutainia nuka natsanmaya̱ nuna entsarartatui tura ni natsantin pushí aentsua nútikia áentsrattawai.

³⁰ Winia Úunt Yusrun winia wenurja̱i̱ ti yumiṉsattajai. Ti untsurí matsatmanum shiir awajsattajai.

³¹ Warí atsuma núnaka sumamtikiainia nuna iwiaakmari̱n uwemtikrattsa Ni untsuurí̱ni̱ apujsattawai.