YKan. 108 - Yus Papí: Shuarja̱i̱ Yus Yamaram Chicham Najanamu

Némas nupetkatai tusar seamu Tawit Kantamámu

¹ Yusá winia enentái̱rka Ámin shiir awajtamuk kantamprútmataj tusa aya ajas pujawai. Tura nu winia enentái̱run tsáapin awajeawai.

² ¡Tura arpáa nuyá̱ ke̱e̱rá shintiarta; yamaram tsawantan ishintiártatjai!

³ Maa Jiuwaá aents iruntramunam shiir awajsattajme. Núnisaṉ uunt nuṉka mátsatkamunmasha shiir awajkun kantan kantampruáttajme.

⁴ Warí Ame waitnenkartutairmeka nayaimpiji̱a̱i̱ naṉkaamas ti úuntaiti. Tura Ame nekas chichakma nuka yuraṉkim ti yaki̱ya̱ tímianai jeawai.

⁵ Maaj nayaimpinmasha, Yusá páantin naat awajsamu atá. Núnisan ashí nuṉkanam Ame páantniurmesha uunt naat awajsamu atí.

⁶ Ame aneamuram ainia nu aṉkant awajnásarat untsuurumji̱a̱i̱ uwemtikram ái̱rkata.

⁷ Yuska Ni Shiir Awajtai̱ Je̱e̱n chichaak “Wikia shiir warastatjai. Sekimnaka nakaran sukartustatjai antsu Sukut pakanka nekapmartatjai.

⁸ Karaatka Wíniaiti núnisan Manaséssha Wíniakete. Antsu Eprainkia Winia mániakur etseṉkrutai̱rua núnisaiti tura Jutaka akupkur takutai̱ Wi takama núnisaiti.

⁹ Muapka ikijmiatai ichiṉnaruiti, Etumnumaani̱nkia Winia sapatrun ukuinkian ajapattajai. Tura Jiristíu aentsnaka nupetkan wararsattajai” tawai Yus.

¹⁰ Wenuke̱ iwiartukar utúachmin awajsamu pépruncha ¿yaki jintintruatⁱ? Núnisaṉ Etumnasha ¿yaki jintintruatⁱ?

¹¹ ¿Yusá Ámechukaitiam iin muí̱jkiartukam? ¿Maa Yusá Ámechukaitiam ii suntarí̱sha nemarchamiam nuá?

¹² Ii nemasri̱ya̱ yáintkiartukta aents yáiṉkratmaka péṉke ántraiti.

¹³ Yus yaintma asaakrin nupetmakartatji. Tura ii nemase̱nka Ni emeskattawai.