YKan. 107 - Yus Papí: Shuarja̱i̱ Yus Yamaram Chicham Najanamu

Yus kúntutsnumia̱ aṉkant awajma

¹ ¡Uunt Yus nekas péṉker asa tura Ni waitnenkartutairi̱ṉkia amuicha asamtai nekas yumiṉsatarum! YKan. 136:1

² Tuma asamtai aents ni nemasri̱ kakarmari̱ya̱ Uunt Yus uwemtikrarma ainia nusha

³ tura etsa̱ jintiainmaani̱ya̱ nuyá̱ akatainmaani̱ya̱sha núnisaṉ arakaani̱ya̱sha nuyá̱ nuṉkaani̱ya̱sha uwemtikrarma ainia nu tu chicharnaisar nuní̱ tiartí.

⁴ Aents atsamunmaani̱ wákar wekaikiní̱ yujarmai péprunam pujusmin ainti tusar túrasha peṉké wáinkiacharmai.

⁵ Tsukamainia tura kitiamainia ásar kakarmachu ajasármai túmainiak jasattuk ajasármai.

⁶ Nuyá̱ jakamnia nekapenak Uunt Yusan untsukarmai tura aṉkant awajsar ni itiurchatri̱ya̱ uwemtikrarmai.

⁷ Tura nekasa nú jintianmaani̱ yaruakar matsamsartatna nú péprunam júkiarmai.

⁸ ¡Uunt Yus aents túrachminia nuja̱i̱ aentsun yaiṉkiu asamtai Ni waitnenkartutairi̱ yumiṉsarti!

⁹ Kame Yuska wakan kitiama nuna kitiakén imiktiniaiti núnisaṉ wakan tsukamá nuna péṉkera nuja̱i̱ ejemamtikiar imiktiniaiti.

¹⁰ Chíkichkia jiruja̱i̱ jiṉkiar sepunam ti kiritniunam tura wariṉsha íischamnia wáitkiasar wáitnenmai ajá matsamin pujusár

¹¹ tura Uunt Yusa chichame̱n ántichu ajasár Ashí Naṉkamantu chicharmasha peṉké nakitín ajasármai.

¹² Tuma asamtai takat ti itiurchat takamtikiainiam ni enentái̱nkia péejchach awajsarmai túrasha tukumak iniaiyarmia nuyá̱ yáiṉtintri̱ṉkia yáakesh atsumai.

¹³ Nuyá̱ jakamnia nekapenak Uunt Yusan untsukarmai tura aṉkant awajsar ni itiurchatri̱ya̱ uwemtikrarmai.

¹⁴ Kirit téenam jákatniunam matsatun ji̱i̱rarmai tura jiṉkiamuri̱n tsurintrarmai.

¹⁵ ¡Uunt Yus aents túrachminia nuja̱i̱ aentsun yaiṉkiu asamtai Ni waitnenkartutairi̱ yumiṉsarti!

¹⁶ Warí yaṉkú jiruja̱i̱ waiti najanamun kupirmai tura jirú winiaṉkencha kupí kupí awajtúsmai.

¹⁷ Chikitcha enentáimcha armia nuka umichu ajasár ní yajauchiri̱ni̱ṉ wáitsarmai.

¹⁸ Ashí yurumkancha nakitrarmai túrawar jatak ajasármai.

¹⁹ Nuyá̱ jakamnia nekapenak Uunt Yusan untsukarmai tura aṉkant awajsar ni itiurchatri̱ya̱ uwemtikrarmai.

²⁰ Ni chichame̱ja̱i̱ tsuararmai. Túrawar jákatniunmaya̱ aṉkant awajsarmai.

²¹ ¡Uunt Yus aents túrachminia nuja̱i̱ aentsun yaiṉkiu asamtai Ni waitnenkartutairi̱ yumiṉsarti!

²² Yumiṉsajme tusar Yus ántar susamu áestuawarti. Nuyá̱ Ni najankamu ainia nu etserawarti tura warasar kantamáwarti.

²³ Chikitcha kanuja̱i̱ nayantsanam akaikiar uunt entsanam kuítian súmainiak,

²⁴ Uunt Yusa túramuri̱n wáinkiaruiti. Kame nayantsa kunarí̱n Ni túramuri̱n tí peṉkera nuna wáinkiaruiti.

²⁵ Ni nayantsan chicharkarmiayi. Túram kakaram nase umpuim tamparukmiayi. Túruna tampari̱ yakí̱ takuniarmiayi.

²⁶ Yakiini̱ṉkia ti yakí̱ wákaar nuṉkaani̱ṉkia tí init nánatamunan ataksha tárarmai. Túmakui̱ nu itiurchatri̱n wáinkiar ni enentái̱ṉkia miniankiararmai.

²⁷ Nampekua núnisar pemperakut ajarmai túrunawar nékachu ajasármai. Tura ashí ni nekatairi̱ ántrauyi.

²⁸ Nuyá̱ jakamnia nekapenak Uunt Yusan untsukarmai tura aṉkant awajsar ni itiurchatri̱ya̱ uwemtikrarmai.

²⁹ Nuyá̱ náseṉmaaka meṉkakamai. Tura nayantsa tampari̱ miaku ajasármai.

³⁰ Nayantsa tampari̱ miaku ajasmatai warasarmai. Nuní̱ tura wakeriarmia nui̱ Ni júkiarmai.

³¹ ¡Uunt Yus aents túrachminia nuja̱i̱ aentsun yaiṉkiu asamtai Ni waitnenkartutairi̱n yumiṉsarti!

³² Aents iruntramunmasha Nin naṉkamantu awajsarti. Núnisaṉ pepru uuntri̱ irunainia nui̱sha shiir awajsarti.

³³ Niṉkia entsancha kukach awajás kampuntin atsú awajeawai. Núnisaṉ púkunincha ju̱ju̱ptin awajniuiti.

³⁴ Nui̱ matsatainia nuna yajauchiri̱n tará nuṉká jeaku awajniuiti.

³⁵ Nisha atsamunmaya̱itiat yapajniá entsa pajamtai najanaiti. Tura nuṉka ju̱ju̱ptinia núnaka púkuni awajniuiti.

³⁶ Nui̱ṉkia tsukamainia nú aentsun iruntrarmatai péprun najanainiawai.

³⁷ Kampunniun takakmasar uwa ajan ajamiar arakma tí nukap neré juíniawai.

³⁸ Tí peṉker matsámtánam yumiṉkramu ásar tí nukap pampainiawai tura ni waakari̱sha menarainiatsui.

³⁹ Kame wáitkiainiamu ásar ti wáitiainiak tura kúntuts nekapenak jakamnia enentáimiainiak menaki̱ ishichik ajakí̱ wénawai.

⁴⁰ Núnisaṉ úunt akupniu uchirí̱ muí̱jkiatin enentáin aentsun eṉketáiniawai. Túramu ásar nakirí̱i̱n jíntiachunam weká núnisar wekaikiní̱ ajainiawai.

⁴¹ Tura aents peṉké takurmakcha núnaka atsamunmaya̱ṉka jíiniaiti. Tura murik pampaak urukniuit timianú untsurí shuarnasha awajniuiti.

⁴² Aents péṉker enentáimkia ainia nuka nuna iisar warasarti. Antsu ashí yajauch enentáimkia ainia nuka chichatsuk pujuwiti.

⁴³ Yaaksha ju̱na nekáa tura esetas anturak umía nuka Uunt Yusa waitnenkartutairi̱n nekaattawai.