YKan. 106 - Yus Papí: Shuarja̱i̱ Yus Yamaram Chicham Najanamu

Israer shuar umikchamu

¹ ¡Naṉkamantuitme Uunt Yusá! Uunt Yus nekas péṉker asa tura ni waitnenkartutairi̱ṉkia amuicha asamtai shiir awajsatarum.

² Uunt Yus tí kakarma nu túrukarmancha ¿yaki ujakminiait? ¿Yaki Ni péṉkeri̱n takamtsuk awajsámniait?

³ Aents ashí tsawant esetar enentáimsar péṉker túruinia nuka shiir awajnásarti.

⁴ Uunt Yusá, ame shuarum waitnentramna núnismek winiasha enentáimtursata. Tura níji̱a̱i̱sha itiur túram nusha winiasha enentáimtursata.

⁵ Kame wisha Ame shuarumji̱a̱i̱ péṉker túramna nuna nekaataj tura niji̱a̱i̱ warainia nuja̱i̱ warastaj núnisnak Áminiu ainia nuja̱i̱ wisha ti shiir nekaprataj.

⁶ Israer shuarti, ii we̱a̱tri̱ tunáa túrawarmia núnisrik Ámin enentáimtachu asarⁱ tunáa túraitji.

⁷ Ii aparí̱ yaunchu Ejiptunam ame ti waitnentainiakum aentsti túrachmin túramun wáinkiariat antra núnis enentáimtuiniak nekaacharmiayi. Antsu Kapantin Nayants yantam matsamsar umiktinian nakitiáiniak aya kájearmiayi. Jiin. 14:10-12

⁸ Túrasha Uunt Yuska nu aentsun ni aneṉkrattai náari̱ji̱a̱i̱ aṉkant awajsarmiayi. Nuja̱i̱ ni kakarmari̱n paant nekaawarat tusa túramiayi.

⁹ Tura Kapantin Nayantsan Uunt Yus chicharkam jímiapetek nakaak ju̱ju̱ptin awajsámtai wekas katia̱rarmiayi. Jiin. 14:21-22

¹⁰ Nuní̱ turá Israer shuaran ni nemasri̱ya̱n Uunt Yus aṉkant awajsarmiayi.

¹¹ Tura entsa ataksha apanaikmatai Israer shuara nemasri̱ṉkia chikichkisha peṉké iwiaakuka juákcharmiayi.

¹² Nuyá̱ Israer shuar Uunt Yusan shiir enentáimtuiniak Ni chichame̱ṉka nekas tawai tusar Ni náari̱n pachisar kantampruáwarmiayi.

¹³ Túrasha tí warichik Uunt Yus túramia nuna kajinmatkiarmiayi. Túmainiak Yusa wakeramuri̱n nekaatniun nákascharmiayi.

¹⁴ Kame atsamunam matsamsar ni wakeruiniamuri̱niak jikiatáiniak nekaspash suramsatajⁱ tuíniak Yusan akajkarmiayi.

¹⁵ Nu túram Uunt Yuska Israer shuar wakeriarmia nuna tímiatrusaṉ súsarmiayi. Tura jatai̱ suṉkuran akuptúkarmiayi. Wek. 11:31-34

¹⁶ Nuyá̱ Israer shuarka matsamkamunam pujusár Muisaisnasha tura Uunt Yus anaikiamu Araunnasha akasmatkiar suir enentáimtuiniak kajeriarmiayi.

¹⁷ Túmainiakui Tataanan nuṉka nakatuk ku̱jarmiayi. Túrak Apiráma írutramuri̱ncha ashí nuṉká utsá̱ yuturmiayi. Wek. 16:24-35

¹⁸ Kame Apiráma shuari̱ Yusa umircha armia núnaka ji yakiya̱ iniantar ashí amukármiayi.

¹⁹ Núnisaṉ Urep nainnium Israer shuar kurí iminiak waaka uchichi nakumak najanawar tikishmátrarmiayi.

²⁰ Nuní̱ túrawar Israer shuarka iwiaaku Yusan shiir awajsatniun iniaisar tumá waakan sa̱a̱ki yuun tikishmátainiak Yusa páantniuri̱nkia ántar awajsarmiayi.

^21-22 Túmainiak Uwemtikin Yus ni kakarmari̱n Ejiptunam iniaktusar núnisaṉ Kaam nuṉkanmasha aentsti túrachminian túramia nunasha tura Kapantin Nayantsanam ni kakarmari̱n iniaktusarmia nunasha peṉké kají kajinmatu ajasármiayi.

²³ Tuma asamtai Uunt Yus Israer shuaran amuktinian enentáimtakui ni anaikiamuri̱ Muisais Yus tsaṉkurarat tusa seatcharuitkiuiṉkia amukara̱a̱yi.

²⁴ Kame wakerú ajamai nuṉkan nakitrarmiayi. Túmainiak Uunt Yusa chichame̱n nekasaiti tícharmiayi.

²⁵ Nu arant ni jutai̱ je̱e̱n pujusár Uunt Yusan anturtsuk yajauch áujmatiarmiayi.

²⁶ Túmainiakui Uunt Yus nekas túrattajai takui̱ Ni uwejé̱n takuí chichaak “Israer shuaran atsamunam asutiátniun

²⁷ tura chíkich chíkich uunt nuṉka mátsatkamuja̱i̱ naṉkaamas Israer yajauch iisma awajsatniuncha nuyá̱ ni tiraṉki̱n chíkich chíkich nuṉkanam matsamsarat tusa tsakiṉmakartinian nunasha túrattajai” tusa tímiayi.

²⁸ Tura Israer shuarka Paarpiuran umirin armia nuja̱i̱ irunar ántar yus, iwiaakcha armia nu, áestamun yúawarmiayi.

²⁹ Túmainiak ni yajauch túramuri̱ji̱a̱i̱ṉ Uunt Yusan akajkarmiayi tura untsurí jákarmiayi.

³⁰ Nui̱ṉkia Yúsnan pujurin Pinias tunáa túruinian máwarmatai nuja̱i̱ jákatniuka nui̱ṉ amukmiayi. Wek. 25:7-9

³¹ Kame ni péṉker túramia nuja̱i̱ Yuska “nekas péṉkeraitme” takui̱ nuka ni tiraṉki̱sha tura nuyá̱ tiraṉki̱sha tuke iniaitsuk nekaamu ártatui.

³² Núnisaṉ Miripia entsanmasha Uunt Yusan ti akajkarmiayi. Núja̱i̱sha Muisais itiurchatan nekapsamiayi.

³³ Kame Israer shuar Muisaisan enentái̱n suir nekapmamtikram nuja̱i̱ ni enentái̱n enentáimtsuk chichasmiayi. Wek. 20:2-13

³⁴ Ántsaṉ Uunt Yus chichaak “Nu aentska mash máarum amuktárum” timia nunasha umikcharmiayi.

³⁵ Antsu Kanaannumia̱ aentsja̱i̱ pachiniairar ni túriarmia nunak nisha túrawarmiayi.

³⁶ Tura nu aentsu najankamu yusri̱n enentáimtuinia ásar emesnararmiayi.

³⁷ Túrunawar uchirí̱ncha tura nawantri̱ncha yajauch wakaní̱n áestuawarmiayi.

³⁸ Túruiniak Kanaannumia̱ najankamu yusan suíniak uchirí̱ncha nawantri̱ncha peṉké nékachun ni numpe̱n uputúrarmiayi. Tura nu numpa ukarmaja̱i̱ nuṉkasha mui̱jmiai̱n ajasmiayi.

³⁹ Kame nu yajauch túruiniamuja̱i̱ utsunáirar tsanirmatai̱ya̱ núnik peṉké netse ajasármiayi.

⁴⁰ Tuma asamtai Uunt Yus ni shuari̱n Níniuya nuna ti kajerak muí̱jkiamiayi.

⁴¹ Nuya̱ṉka uunt nuṉka mátsatkamu armia nui̱ iktua iniaisarmiayi. Tura Israer shuaran nakitiarmia nu aentsuk niṉkia nupetkarmiayi.

⁴² Ni nemasri̱ṉ nupetkar iniatai̱ awajsar tí waitkiasarmiayi.

⁴³ Tura Yuska Israer shuarnaka tuke aṉkant awajki̱ émamaitiat ni enentái̱ji̱a̱i̱ṉ wekainiak Yusan umirkacharmiayi. Túmainiak ni yajauch túramuri̱ji̱a̱i̱ṉ natsanmai̱ ajakármiayi.

⁴⁴ Tuma ai̱ṉ Uunt Yus Israer shuar wáitiainiak seamka waitnentar anturiarmiayi.

⁴⁵ Túmak yaunchu niji̱a̱i̱ chichaman najanamia nuna enentáimias ni waitnenkartutairi̱ṉkia náṉkatkachu asamtai waitnentiarmiayi.

⁴⁶ Núnisaṉ ashí achirar yaruakaruya nunasha waitnentrarat tusa waitnenkartutai̱ enentáin eṉketáwarmiayi.

⁴⁷ Nuyá̱ ataksha enentáimprar chicharainiak “Ii Uunt Yusri̱yá, ashí nuṉkanmaya̱ irukrattram aṉkant awajkartusta. Ame náaram enentáimtusar shiir awajsatai tusar wakerakur taji” tiármiayi.

⁴⁸ ¡Uunt Yus Israer shuara Yusri̱ yáunchusha yamaisha ukunmasha tuke shiir awajnásti! Ashí aentstirmesha “¡Nuke atí!” titiarum. ¡Naṉkamantuitme Uunt Yusá!