YKan. 104 - Yus Papí: Shuarja̱i̱ Yus Yamaram Chicham Najanamu

Ii najatma nuke shiir awajsatniuitji

¹ Winia enentái̱ru Uunt Yusa naari̱ tuke shiir awajsata. Uunt Yusa, winia Yúsruitme. Ameketme nekas Úuntam wincharmiji̱a̱i̱ tsáapniniaitme.

² Ame nérentin asam tsáapnintrumji̱a̱i̱ pushí áentsratniua áitkiaitme. Tura nayaimpikia tarach ayapá̱rma nútiksam ikiusuitme.

³ Ame pujutai̱ṉkia ti yakí̱ éntsanmaṉ jeamniuitme. Ame eṉkempra wekatairmesha yuraṉmiti tura nasenam wekainiaitme.

⁴ Áminiun etserniuka nase áiniawai. Tura Ame takartámniuka jíyaiti. 2 Akup. 2:11; Isr. 1:7

⁵ Péṉker aepak nuṉkancha najanamiayi. Tuma asa peṉké umuchkiachminiaiti.

⁶ Nayantsaja̱i̱ṉkia pushí aentsua nútiksam áentsramiame. Túramu asa náintniaka entsa amuruyayi.

⁷ Tura ipiamtaja̱i̱ métek chicharkam nu chichamtaik kanararmiayi.

⁸ Tura naintkia yakini̱ wéakui antsu pákaka nuṉkaani̱ Ame tui̱ pujustarum tiarmam nui̱ṉ ashinkiarmai.

⁹ Ame ju̱i̱ṉ naṉkantia tímiam nui̱ṉ naṉkanka áiniawai. Tuma asa atakka nuṉkanka amurchattawai.

¹⁰ Núnisaṉ náintniumia̱ púkuni jiini̱ ashints wainia Amek najankamiame.

¹¹ Nu túrawakmin ashí kampunniunmaya̱ yajasma tura kampunniunmaya̱ umpurusha entsa umarar kitiakén imikiainiawai.

¹² Núnisaṉ ashí nanamtin ainia nu entsá yantam yujainiawai. Tura numiniam ekemsar shiniuiniawai.

¹³ Ame pujamna nuya̱ṉ naintcha ukateame. Nuja̱i̱ nuṉkaya̱sha nútsuiniawai.

¹⁴ Tura sa̱a̱kkia ashí yajasma yuáwarti tusam tsapamtikme. Núnismek kampunniuka aents takakmas yurumáwarmi tusam súsaitme.

¹⁵ Umutai péṉker ainia nuna umarar shiir enentáimsarmi nuyá̱ uriwiu numi asuitiri̱ji̱a̱i̱ yurumkan pachimiar yuáwar aya̱shi̱ kakaram yapí puapuat tsamapkarin iira árat tusam súsaruitme.

¹⁶ Uunt Yuska ashí numincha tura Ríwianunmaya̱ sétruncha saṉkut shauṉ tsakarárat tusa tsapamtikiaiti.

¹⁷ Nui̱ chiṉkisha kanawe̱n pasuṉmainiawai. Tura ímiaka tsakari̱n pasuṉmainiawai.

¹⁸ Naintkia, kampunniunmaya̱ chipiu matsamtainti. Kayá wa̱a̱ka náinniumia̱ sa̱wa̱ pampaatainti.

¹⁹ Amek kashi nántuka tsawant nekapmarar nekaatin najanaitme. Tura étsa̱ka taka akaamuri̱ nekaatin najanaitme.

²⁰ Ame kashi ajasta tákumin kirit ajawai. Túrunamtai ashí yajasma kampunniunmaya̱ jíiniar yujainiawai.

²¹ Úunt ya̱wa̱ka namaṉᵏᵉ surusai tusa Yusan seainiak úttin áiniawai.

²² Tura tsawa̱rmataiṉkia namaṉke̱ jurumkiar wá̱a̱ri̱n tepenawai.

²³ Aentska takatrí̱n jíintiukiar takáa takakua kintiamniuiti.

²⁴ Uunt Yusá ti urutmatsuk ame nekatairmiji̱a̱i̱ najankaitiam. Nuṉkanka ame najankamurmek piákuiti.

²⁵ Nui̱ nayants ti waṉkaram náṉkatkachu awai. Nui̱sha namak nekapmarchamnia tura yajasmasha uuntcha uchichisha irunainiawai.

²⁶ Nui̱sha uunt kanu wekainiawai. Tura uunt yajasma riwiatán nakurúsat tusam najanaitme.

²⁷ Nusha warí tsawantinia Ame ayuratniuitiam nuna nákainiawai.

²⁸ Ame súam e̱a̱mak yurumá ejemainiawai.

²⁹ Antsu Ame páchiachmaka yurumtsuk pujuiniak tsukari̱n jaka nuṉka ajak aya meṉkainiawai.

³⁰ Túmainiak ataksha Ame Wakanmi kakarmari̱ji̱a̱i̱ ipiampáiniame. Túrakum nuṉkaka ímiatrusmek awajeame.

³¹ Uunt Yusa páantniuri̱ṉkia tuke atí. Ame najankamurmiji̱a̱i̱ Uunt Yusa warasta.

³² Kame Yus nuṉkan najana asa ú̱u̱rmamtikiui. Túram naintcha muchitrar mukuintiuiniawai.

³³ Tuma asamtai iwiaakjana ju̱i̱ṉkia Úunt Yusrun kantampruáttajai.

³⁴ Tuke enentáimtakun shiir enentáimtikrattsan wakerajai. Túrakun Niji̱a̱i̱ warastatjai.

³⁵ Nu tuma asamtai tunáa aents ju̱ nuṉkaya̱ jí̱i̱kiaru ártí. Núnisaṉ Yusan enentáimtichu ainia nuka ashí amunkarti tajai. Maa, Winia wakantru Uunt Yus tuke shiir awajsata. ¡Naṉkamantuitme Uunt Yusá!