YKan. 103 - Yus Papí: Shuarja̱i̱ Yus Yamaram Chicham Najanamu

Waitneṉkratin asamtai Uunt Yus kantampramu

Tawit kantamámu

¹ Winia wakantru, Uunt Yusa naari̱ tuke shiir awajsata. Tura tunaarincha asamtai enentái̱rsha wakantrusha nuyá̱ aya̱shrusha ni náari̱n shiir awajsarti.

² Winia wakantru, Uunt Yusa naari̱ tuke shiir awajsata. Winia wakantru, Ni péṉkeri̱ja̱i̱ yáintkiania nuka chikichkisha peṉké kajinmátkip.

³ Aya Níṉkiti tunaarumin tsaṉkur ashí najaimiamurmin ayamtikrutmawa nuka.

⁴ Jákatniunmaya̱ uwemtikrama nuka ni waitnenkartutariji̱a̱i̱ péṉker awajtámsaiti.

⁵ Tura ame wakeramurmin aya péṉkerja̱i̱ṉ Uunt Yus nútsumtikramprattawai. Nuna tura uchimiatkiarma ukukuí yakí̱ wekainia ánis warii awajtámsattawai.

⁶ Uunt Yuska péṉker tura naka túrin asa ashí wáitkiasma pujuinia nunasha yáiniawai.

⁷ Tura Muisaisnaka Ni wakeramu túratniuri̱n jintintrámiayi tura Israer shuarnaka Ni túramuri̱n iniaktusarmiayi.

⁸ Uunt Yuska tsaṉkurkartur waitnenkartiniaiti. Kame ti waitnenkartin asa wárik kajechuiti.

⁹ Iin kajertamkasha tuke kajekka pujuchuiti.

¹⁰ Tuma asa tunáa túrajnia nuja̱i̱ métek asutiámchaitji.

¹¹ Uunt Yusa waitnenkartutairi̱ṉkia nayaimpi yakiri̱ya̱ timianú úuntaiti. Tuma asa nin ashamak umirainia núnaka ti waitnentainiawai.

¹² Nantu jiini̱ akaana nuna naṉkaamas jeachat Uunt Yus ii tunaarí̱ya̱ akantámkiniaitji. Tuma asa tuke akantamji.

¹³ Apa ni uchirí̱n waitnenta nútiksaṉ Nin arantúkmaja̱i̱. Umirainia núnaka Uunt Yus waitnentainiawai.

¹⁴ Warí, iiṉkia nuṉkaja̱i̱ najatmamiaj nuna nekáa asa waitnentramaji.

¹⁵ Aentsu iwiaakmari̱ṉkia nupa̱ ániuiti. Tura kampunniunam kuku̱jⁱ kuku̱jrana núnisaiti.

¹⁶ Kukujsha nase umpuí akakmasha tuyá̱ akaaka nusha nékantsui. Kame aentsu iwiaakmari̱sha núnisaiti.

¹⁷ Tura Nin ashamainiak umirainia núnaka yáunchuya̱sha ukunmasha tuke iniaṉnatsuk Uunt Yus waitnentainiawai. Kame uchirí̱ncha tura tiraṉkí̱ncha ashí yáiniak nekasa nuna túrattawai.

¹⁸ Kame arantuiniak chícham najanamuncha tura akupkámu chichamnasha umirainia nuna waitnentainiawai.

¹⁹ Uunt Yusa pujutái̱ri̱ṉkia nayaimpinmaiti. Tura ashí takamtsuk akupniuiti.

²⁰ Ni kakaram suntartiram Ni tana nuja̱i̱ métek umirniutirmeka atumsha Uunt Yus shiir awajsatarum.

²¹ Kame nayaimpinmaya̱ suntartirmesha ashí ni wakeramu túrin asarum Uunt Yus shiir awajsatarum.

²² Núnisaṉ ashí Ni akupeamunam najankamu íruntrumna nútirmesha “Ameketme Naṉkamantu Yusmeka” titiarum. Maa, winia wakantru Uunt Yusa naari̱ tuke shiir awajsata.