YKan. 102 - Yus Papí: Shuarja̱i̱ Yus Yamaram Chicham Najanamu

Wáitiakur Yus seamu

¹ Uunt Yusa, wi seamu anturtukta. Tura seajmena nu Ámin jeatí.

² Kame jakamnia nekapeakun wi seattajmena nu tsawantinkia anturtutskeka iniaitiusaip. Wi untsuktatjamna nu tsawantinkia wárik ái̱rkata.

³ Warí, wi jinia mukuintiuri̱ wárik meṉkana núnisaitjiai. Tura ukunchrusha najamáiniak ji kapá̱a̱ ánis kápa̱a̱r awajtuiniawai.

⁴ Winia itiurchatruja̱i̱ kúntuts nekapeakun nupa̱ tsupikiam kaana ánkiajai. Tuma asan yurumátniuncha enentáimtichmajai.

⁵ Wi úttsanak watsá watsá ajasan úkunchik ajasmajai.

⁶ Tuma asan kampuntin atsunumia̱ ampush tura sukuyá kashi chicháa chichaakua tsawai̱nia núnin nekapmamjai.

⁷ Núnisnak kanarchamnia nekapeakun chiṉki níchik je̱á̱ tuntupén ekemniua núnis enentáimtumamjai.

⁸ Winia nemasruka tuke tsawant jíattsaraṉ pujurtuiniawai. Tura winia áujmatrusar wishikruinia nusha yajauch awajtústai tusar chichaman najatruiniawai.

^9-10 Amesha ti kajertukam jí̱i̱kim ajunmiame. Túramu asam wikia yuṉkunmin yúakun apatkun yúa núnis nekapeajai. Tura wi úmamurnasha nea̱jkirja̱i̱ pachimpran úmajai.

¹¹ Tuma asamtai winia iwiaakmarka mikintra ánis naṉkaamawai. Túmakun nupa̱ kaarua núnis ajasjai.

¹² Túrasha Ámeka Uunt Yus tuke pujutniuitme. Tuma asakmin ukunam akiiniawartatna nusha Ámin tuke enentáimturmartatui.

¹³ Warí, Seun waitnentratin tsawant yaunchu jeayi. Tuma asamtai yamaikia waitnentrata.

¹⁴ Ámin takartámin ainia nuka ame je̱e̱m sa̱a̱nak punarmari̱n enentáimtusar anenak ti kúntuts pujuiniawai.

^15-16 Túrasha Uunt Yus ataksha Seúnnum Ni Je̱e̱n je̱a̱m Ni péṉkeri̱n iniaktusartatui. Nuna túramtai Ni kakarmari̱n wáinkiar ashí nuṉkanmaya̱ aents tura ashí úunt akupin ainia nusha Uunt Yusa náari̱n ashamkartatui.

¹⁷ Nu túrunamtai ji̱i̱ra akuprámu seamuri̱ncha anturkartatui.

¹⁸ Ukunam akiiniawartatna nusha nekaawar ii Yusri̱n wararsarti tusar ju̱ chichamka aarma atí.

^19-20 Shuar sepunam pujusár útainian anturkataj tusa, tura jákatniunam sumamtikiamun aṉkant awajsattsa nayaimpinmaya̱ Uunt Yus iimsamiayi.

^21-22 Kame ashí nuṉkanmaya̱ untsurí shuar iruntrar chikichik ajasár Seúnnum Winia náarun pachisar warasar takartin armi tusa túramiayi.

²³ Úchipiaitiatnak kakarmarchu nekapramjai. Warí Nisha winia tsawantrun táatkimiai.

²⁴ Túrunan chicharkun winia Yusru jákatin tsawantur jeatsa̱i̱ṉ ájapeni̱ṉ jurukip. Warí, Ame uwirmeka ukunam matsamtatna tímianaisha amuutsuk tuke ártiniaiti.

²⁵ Yámankamtaikniumia̱ nuṉkasha najanamiame tura nayaimpisha Amek ame uwejmiji̱a̱i̱ najankamiame.

²⁶ Nu amuukarmataisha Ámeka tuke pujutniuitme. Kame nayaimpisha tura nuṉkasha pushí arutmána núnisaraṉ arutmárartatui. Túrunamtai pushí yapaji̱átniua nútiksam yapaji̱ám nekas yapaji̱ámu ártatui.

²⁷ Túrasha Ámeka tuke pujuwitme. Ame uwirmeka peṉké náṉkatkachuiti.

²⁸ Tuma asakmin Ame takartámniu uchirí̱sha péṉker wainkiamu matsamsartatui. Tura ní weasha Amiin tuke péṉker pujusártatui.