YKan. 101 - Yus Papí: Shuarja̱i̱ Yus Yamaram Chicham Najanamu

Naka túratniun nekas umiktatjai tama Tawit aarma

¹ Maa Jiuwaá waitnenkartutairmin tura naka sumamtiktairmin kantampruáttajme.

² Ti peṉker imiatkincha naka pujustinian wakerajai. ¿Urutáiṉ winiasha taruttiam? Wikia yajauchikia tíchamnia átatjai tura winia je̱a̱ruí̱ncha núnisnak pujustatjai.

³ Nekascha nuja̱i̱ métek túramu ainia núnaka peṉké pachischattajai. Awajirar yajauchin túruiniana núuri̱nkia peṉké muí̱jruiniajai. Núninkia wini̱ṉkia peṉké atsuttawai.

⁴ Yajauch enentáimmiaka wini̱ya̱ kanakmiatai yajauchia núnaka nekashtatjai.

⁵ Ni írutramuri̱n u̱u̱k tsanumpruinia núnaka wi emeskattajai. Waantu enentái̱ji̱a̱i̱ iimiainia núnaka tura naṉkamantu enentáimtumainia nunasha katsuntu ajashtatjai.

⁶ Wiji̱a̱i̱ pujusárat tusan ju̱ nuṉkanam tímiatrusan umin ainia nunak wikia íisartatjai. Ya imiatkincha péṉker jintianam wekáa nuke wíniaka yáintkiartatui.

⁷ Anaṉmau ainia nuka winia je̱a̱rui̱ pujuschartatui. Núnisaṉ wáitian chicháu ainia nusha wi pujamunmaṉka pujuschartatui.

⁸ Ashí nuṉkanam Yusan enentáimtichu matsatainia núnaka káshik emeskaran ashí yajauchin túrin ainia nuna Jiuwáa pépruri̱ya̱ṉka amukártatjai.