Use. 6 - Yus Papí: Shuarja̱i̱ Yus Yamaram Chicham Najanamu

Israer shuar ántar waketkitiai tiarma

¹ Ashí Israer shuarti Uunt Yusai̱ waketkiartai. Kame jáakri̱ncha tura Ni iin numpampramaitkiuisha páchitsuk ii Yusri̱ṉkia tsuármartatji.

² Tura jimiará tsawant naṉkaamasmatai ataksha iwiaakman amastatji nuyá̱ menaintiú tsawant jeamtai iniantamkittiaji nui̱ṉkia Niji̱a̱i̱ tuke iwiaaku pujustatji.

³ Uunt Yus nekaatin ti wakerukar kakaram e̱a̱kartai. Warí etsa̱ imiá nekas jíinkittiana núnis tura yumi nekas yutuk nuyá̱ ataksha imiá nekas yutuktatna núnis Uunt Yus iin tarutramartatjinia nuja̱i̱ métek nekas nekamniaitji.

Uunt Yus Israer shuaran ai̱kma

⁴ Tura Uunt Yus chichaak “Eprainkiá tura Jutáa atumniasha ¿warí itiurkatjarmek? Warí atumí umitiairi̱ṉkia káshik yuraṉkim nuṉká utsanar áyat tura sanamákiat nantu sukuam wárik meṉkaana ániuiti.

⁵ Tuma asamtai Winia etserniurja̱i̱ Winia chichamprun ujakmajrumna nuja̱i̱ métek umikmajai. Kame átum túramun íirsan péṉkera nuna yáiṉmajai tura tunáa túramunam asutiámjamna nuja̱i̱ Wi wakeraj nu nekas paant awajsamuiti.

⁶ Warí taṉku máarum áesturatniuja̱i̱sha naṉkaamas nekaska Winia anentak tusan wakerajai. Núnisaṉ Wíji̱a̱i̱ṉkia Yus nekaatniuka takamtsuk áesturatniuja̱i̱sha naṉkaamas péṉkeraiti.

⁷ Kame nisha Ataṉja̱i̱ métek chícham Wi Israerja̱i̱ najanamun umikcharu ásar núja̱i̱ṉ Winia nemasrua núnis anaṉkruawaruiti.

⁸ Karaatnumia̱ṉka ti yajauchin túrin tura maṉkartin ásar numpan maatra áiniawai.

⁹ Kasa shuar jintian ákirna núnis Yúsnan pujurin iruntrar Sekim jintianam maṉkartuiniak peṉké yajauchin túruiniawai.

¹⁰ Israer shuarnum ti yajauch túruiniamun wáinkiaitjiai. Nui̱ Eprain shuarsha Uunt Yusan iniais najanamu yusan enentáimtuiniak tsanirma núnis ajasárai. Nuna Israer shuarsha jurumakiarai.

¹¹ Tura Wí shuar achirar yajá yaruakman ikiankattajna nui̱ṉkia Jutáa atumniasha júuktin tsawantrum iwiarturmaitrume” tímiayi.