Use. 2 - Yus Papí: Shuarja̱i̱ Yus Yamaram Chicham Najanamu

¹ Nuya̱ṉka atumí yachi̱ chicharkuram ‘Ami’ titiarum. Tura atumí umai̱ṉkia ‘Rujama’ titiarum” Yus tímiayi.

Uunt Yus Ni shuari̱ ántuiniachkui asutiámu

² “Atumí nukurí̱ súmamtikiakrumka sumamtikiatarum. Warí yamaikia winia nuá̱rchaiti tura wisha ni áishri̱sh áishri̱nchuitjiai. Tura tsanirmatainkia iniaisati tura tsaniri̱n netsepnum awaṉ tsanirmatainkia iniaisati.

³ Tsanirmatan iniaiyachkuiṉkia misú áiktatjai túran akiiniuk urukuya áitkiawa̱i̱j. Kampuntin atsú nuṉka ajasmatai tura káakmatai kitiakai jaka̱i̱.

⁴ Tsanirnumia̱ uchi ásarmatai ni uchirí̱ncha waitnentrachartatjai.

⁵ Ni nukurí̱ tsanirmatamai tura ajapruk uchin natsamtsuk takus chichaak ‘Winia anentin armia nui̱ yurumátniurun, winia entsarun tura urerun, ríniurun nuyá̱ winia asuitirun tura winia umutairun surusarat tusan wetajai’ tímiayi.

⁶ Tura ni jinti̱nkia jaṉkiji̱a̱i̱ akirtuktatjai tura jaṉkin irutrattajai. Túram ni jinti̱nkia nekashtatui.

⁷ Ni anetairi̱nkia pataatuktatui túrasha amayá̱nchartatui, e̱a̱ktatui túrasha wáinkiashtatui. Nuiṉkia chichaak ‘Winia emka áishrui̱ni̱ṉ waketkitjiai’ títiatui. Yamái pujajna nuja̱i̱ naṉkaamas yáunchuka Niji̱a̱i̱ péṉker pujuyajai.

⁸ Wi, tríkiun, wíniun, asuitin súmiaj núnaka niṉkia nekaachmai. Wi tí nukap kuítian kurin súarmajai. Nuja̱i̱ ni yusri̱n Páaran najanawarmai.

⁹ Tuma asamtai yamaikia winia tríkiur neretai tsawantnasha tura winia wíniur umutai tsawantnasha tura winia ríniurnasha ure̱ja̱i̱ najanamu misú pujakui entsatáirnasha ataksha wini̱i̱ṉ ashí awaṉtumkittiajai.

¹⁰ Yamaikia ní anetai armia nu iimiainiamunam ni wáurtairi̱ni̱ṉ misú áiktatjai tura Winia uwejruí̱ya̱ṉka peṉké uwemprachartatui.

¹¹ Ashí ni nampermatai yamaram nantuncha sáwar enentáimtutai̱ncha tura ashí namper najantaincha ni waratáiri̱n mitia awajtústatjai.

¹² Íkiuncha tura uwa ajancha ‘Ju̱ja̱i̱ winia tsanir akirkarmai’ tiarma núnaka emestukarjai. Túrawaram ni ajarí̱nkia kampuntin ajasármatai kampunniunmaya̱ yajasma yuáwartatui.

¹³ Kame Páaran kuṉkuinian áestak kuishniun aki̱i̱tia̱i̱n aki̱a̱r tura tí shiirmach iwiarmamtaiji̱a̱i̱ iwiarmameak tsawantan ántar wasurka asamtai asutiáttajai. Túmak Wíniaka kajinmátruki̱ ni tsaniri̱ji̱a̱i̱ weúwiti” tawai Uunt Yus.

¹⁴ “Túrasha ju̱ nekaata, wikia péṉker chichasan kampuntin atsunum jukin ni enentái̱n chichastatjai.

¹⁵ Uwa ajarí̱nkia nuya̱ṉ susattajai tura Akur pákaka péṉker átin nákamua núnis niṉkia arittiawai. Núnisaṉ natsa asa tura Ejiptunmaya̱ yama jíinkiuṉ chichamia núnis ai̱rkattawai.”

¹⁶ Uunt Yus chichaak “Nu tsawantinkia ‘Paari’ túruttsuk antsu ‘Ishi’ turuttiatrume.

¹⁷ Kame nu tsawantinkia najankamu yus untsurí Paara naari̱ pachia asakrumin kajinmamtikiattajrume túramu asarum ni náari̱ṉkia atakka peṉké pachischattarme.

¹⁸ Tura nu tsawantinkia Israer shuaran waitnentraran ashí kampunniunmaya̱ yajasma ainia nuja̱i̱ tura yakiya̱ nanamtin ainia núja̱i̱sha nuyá̱ napiji̱a̱i̱sha nawamnairar pujusárat tusan chichaman najanattajai. Tura tíshimkiuncha puya̱ncha núnisaṉ mesetnasha atsutí tusan amuktatjai. Túran imiatkinchanum aṉkant apujsartatjai.

¹⁹ Israer shuartirmeka winia nekas nua̱r átatrume. Kame winia nekasa nu túrutairja̱i̱sha péṉker túrutairja̱i̱sha tura waitnenkartutairja̱i̱sha nuwa̱ papiji̱a̱i̱ nuatkamua áintsarum átatrume.

²⁰ Kame nekas winia nua̱r ajasrum péṉker wáiniam Uunt Yus paant nekaattarme” tímiayi.

²¹ Uunt Yus chichaak “Nu tsawantinkia nayaimpinkia Wi íistatjai tura nayaimp nuṉkan íistatui.

²² Nuṉkasha tríkiun nuyá̱ asuitin tura uwa yumiri̱n Jisriiran susattawai.

²³ Nu tsawantiṉkia Israer shuaran araatniua áitkiasnak Jisriirnum apujsartatjai. Túran Ru-rujaman waitnentrattajai tura Ru-amincha chicharkun ‘Wí shuaraitrume’ tiártatjai tura nisha chichartuiniak ‘Ámeka ii Yúsri̱nme’ turutiartatui” tawai Uunt Yus.