Use. 14 - Yus Papí: Shuarja̱i̱ Yus Yamaram Chicham Najanamu

Useas Israeran Yusai̱ waketkitiarum timia

¹ ¡Maa Israerá, atumí Yusri̱ Úunt Yusai̱ni̱ṉ waketkitiarum! Warí atumí tunaari̱ji̱a̱i̱ṉ ti yajauch ajasurme.

² Uunt Yusai̱ waketkirum seakrum “Ii yajauch túrutairi̱sha ashí tsaṉkurkarturta. Túram péṉker wáinmena nuja̱i̱ shiir enentáimkiartusta. Túrakmin ii wene̱ja̱i̱ yúmiṉkiakur waaka maar súamua áitkiasar kantampríttiaji.

³ Kame Asiriaka tura chíkich aentssha yaintmakchamnia ásarmatai pachischattaji tura iiksha kawainium ekemkatniusha enentáimsashtatji. Núnisaṉ ántar yus íi najankamuk ainia nusha ‘Ámeka ii yúsri̱nme’ tíchattaji. Warí mitiaik ainia nuka Ame waitnenkartutairmin wáinkiartatui” titiarum.

⁴ Nuyá̱ Uunt Yus jú̱nis tíniuiti. Wi kajerkámiaj núnaka Wikia kajinmátkiniaitjiai. Tuma asan ántichu ainia nunasha tsuártatjai túran ti aneawartatjai.

⁵ Kame Israernaka Wi sana sanamtikna nútikiakun kuku̱j kuku̱jrana nútikiattajai. Túran Ríwianu naintia ímianu umuchkiachmin kaṉkaprumtikiattajai.

⁶ Ni kanawe̱sha tseṉkerartatui. Tura ni peṉkeri̱ṉkia uriwiua ánis nuyá̱ kuṉkunti̱sha Ríwianunmaya̱ setru kuṉkunti̱a ímianu kuṉkuittiawai.

⁷ Kame Israer shuarsha waketrartatui túrunawar Yusa ejetari̱n ejamak pujusár yurumkan arakmawartatui túram uwa núnis kuku̱jrukartatui. Kame ni kuṉkunti̱sha Ríwianunmaya̱ winiu kuṉkunti̱ya̱ tímianu kuṉkuittiawai.

⁸ Maa, Eprainkia, najankamu yus ainia nunasha yamaisha ¿warinia íistiniaitiaj? Witjiai ámin wáinkiun íistinniaka. Wikia sepris numi sameka núniniaitjiai tura Winia shuaruka ni nere̱n wini̱ṉ wáinkiartatui.

⁹ ¿Ya nékait? Nuka ju̱na péṉker antuktatui. Tura ¿ya esetar enentáimniuit? Nuka ju̱na nekaattawai. Warí Uunt Yusa jinti̱nkia nákaiti tura péṉker enentáinniuka nuja̱i̱ wekasartatui tura ántichu ainia nuka nui̱ṉ tukumkar iniarartatui.