Use. 13 - Yus Papí: Shuarja̱i̱ Yus Yamaram Chicham Najanamu

Israer shuarka peṉké amuukamu

¹ Eprain shuar chichainiakuiṉkia Israer shuarka ashamainiak anturiarmiayi. Tura ukunam Eprainkia Israernum niṉki naṉkamantu awajmámsamiayi. Túrasha najankamu yusan Páaran tikishmátu pujus jakamiayi.

² Tura nu arant tunaan túruki̱ wénak ni kuítri̱ji̱a̱i̱ ántar yusan ni nékamuja̱i̱ untsurí niisháa najanawar aentska nú yusan shiir awajsatai tusar áestuinia nuna “Waaka uchich nakumka najanamun mukunáwarti” tuíniawai.

³ Tuma ásar Eprain shuarka káshik yuraṉkim nuṉká utsanar nuyá̱ sanamák meṉkana tura nase kakaram iniar tsuátan umpuí yarumna nuyá̱ jinia mukuintiuri̱ jíiniana núnis wárik meṉkakartatui.

⁴ Ejiptunam pujumiarmena tímianiaṉ Wikia atumí Úunt Yusri̱ntjiai. Wíkitjiai Yus. Chíkichkia wáinkiashtatrume. Tura chíkich uwemtikkiartincha wáinkiashtatrume antsu aya Wíkitjiai.

⁵ Kampuntin atsú ju̱ju̱ptin entsa atsamunam pujumiarmena nui̱sha Wikia ashí péṉker wainkiamiajrume.

⁶ Tura yurumkanka amasmajrume túramu asarum núkap yurumá ejemarum atumí enentái̱n naṉkamantu enentáimtumakrum Wíniaka kajinmátrukmiarme.

⁷ Tuma asamtai Wikia úunt ya̱wa̱ núnis jintiá nákaktatjarme.

⁸ Wikia chai̱ uchirí̱ jurukmia kajek wekaana ántsanak iṉkiuṉkartatjai. Tura úunt ya̱wa̱ yukartana núnisaṉ yukartakun achia̱ran tepetar amajkattajai.

⁹ Maa Israer shuartirmiṉkia Wiki amuktatjarme. Tuma asamtai atumniasha yaki ayamprútmakarat.

¹⁰ Atumí akupniúri̱sha tura úuntri̱sha yaunchu seatmiarum nusha ¿yamaisha tui̱ṉ pujuinia? Kame ¿niji̱a̱i̱ ashí péprunmaya̱tiram uwempratin enentáimprachmakarum?

¹¹ Kame Wi atumín suir enentáiji̱a̱i̱ akupniun anaitiukmajrume, túrayatnak kajerkan nu akupniun jurusmajrume.

¹² Tura Eprainia tunaari̱ṉkia kajinmátnaki̱ tusar júukar péṉker ikiusma núnisaiti tuma asa ni yajauch irutmampramuja̱i̱ṉ asutniáttawai.

¹³ Uchi enentáincha akiiniatniuri̱ tsawant jeamtai péṉker jíintsuna Eprainkia núnis asa nuwa̱ uchin takustaj tusa najaimiana núnis najaimiatniuri̱ tsawant jeartiatui.

¹⁴ Seura kakarmari̱ya̱ ata̱i̱ttiajrume, jákatniunmaya̱ uwemtikrattajrume. Jatái̱yá, emestairmesha ¿itiurkamea? Seurá, ame ijiukrattairmesha ¿itiurkamea? 1 Kur. 15:54-55 Wi enentáimmiaka peṉké yapaji̱áchminiaiti.

¹⁵ Kame Eprain Israer shuarja̱i̱ pampaakuisha Úunt Yusai̱ya̱ kampuntin atsú nuṉkanmaya̱ nase tarí ni entsari̱ncha tura púkuniri̱ncha kukach awajtúsartatui. Túrunamtai ni nemasri̱ káutkar ni kuítri̱ncha tura ni wariri̱ncha ashí yarurkartatui.

¹⁶ Samarianmaya̱ aentska ni Yusri̱n nakitiáiniak enentáimtuscharu ásar asutniáwartatui. Kame puya̱ja̱i̱ awatiar núnisaṉ uchincha aji̱a̱rar tura nuwa̱ ajamtin ainia nunasha ajape̱ máwartatui.