Use. 12 - Yus Papí: Shuarja̱i̱ Yus Yamaram Chicham Najanamu

¹ Eprainkia áyatik nasen yuinia núniniawai. Túmainiak nase etsa̱ jintiainmaani̱ya̱ umpuana nuna ashí tsawant takamtsuk apapéana núniniawai. Warí Asiriaja̱i̱ chichaman najanawaru ásar aya wáitniak tura ámukatniunak ikiauntumainiawai. Nuyá̱ asuitincha Ejiptunmaani̱ yarumainiawai.

² Tuma asa Uunt Yuska Jutanka kajerkaiti. Tura Jakupnasha ni wekaasamuri̱ji̱a̱i̱ métek asutiáttawai. Nuyá̱ ni túramuri̱ji̱a̱i̱ métek akikiártatui.

³ Ni nukurí̱nia̱ akiintsuk ni yachí̱ saṉkani̱n achimkiámiayi. Tura uunt ajassha Yusja̱i̱ mánaikmiayi.

⁴ Yusa suntari̱ncha nupetak nupetmaku ajasmiayi. Útmiayi tura seamiayi. Núnisaṉ Pitir nuṉkanmasha wainkiamiayi tura nui̱ Niji̱a̱i̱ chichasmiayi.

⁵ ¡Uunt Yus, Ashí Akupin Yus! Ni náari̱ṉkia Úunt Yusaiti.

⁶ Nui̱kia ame Yúsrumini̱ṉ ámeka waketkitia. Tura Yusai̱ enentáimsam pujá asam akupeamu Níniua nuna nékaseṉ ayampruiniana nuja̱i̱ métek túrakum ame Yúsrum tuke enentáimtusam pujusta.

⁷ Súrin kijin nekapmatai̱n métekchan takakainia núnisaraṉ itiurchat awajkartustinian timiá enentáimtuiniawai.

⁸ Túrasha Eprainkia chichaak “Nékaseṉ wikia kuítrintin ajasjai, kuítniaka wínianak wáinkiaitjiai. Winia takatrui̱ṉkia mui̱jmiainniasha tura tunaancha peṉké yaaksha wáinkiashtatui” tawai.

⁹ Túmaitkiuisha Wikia Ejiptunam pujumiarmena nuya̱ṉ yamaiya̱ ju̱i̱sha atumí Yusri̱ Úunt Yusaitjiai. Tuma asam nampertin itiurniuitrum nútiksanak jutai̱ je̱a̱nmaṉ matsastatjarme.

¹⁰ Yúsnan etserniun chichasáruitjiai tura ímiaja̱i̱k wáinmancha tí nukap iniakmasaruitjiai. Yúsnan etserin ainia nuní̱ métektaku chichamnasha chichasmajai.

¹¹ Karaatnum tunáa ákuiṉkia nú nuṉkaka peṉké antar awajnástatui. Tura Jirkarnum waakan máwar áesainiakuisha ni áestutairi̱sha kaya tsairma arant tepetar ajainia núnikiartatui.

¹² Jakupka pisar Aramnum wémiayi. Tura Israerka nuwa̱n wakerak chikichan takarin ajasmiayi. Núnisaṉ nuwa̱ wakeramuja̱i̱ murikiu wáinin ajasmiayi.

¹³ Nu arantcha chikichkí Yúsnan etserniuja̱i̱ṉ Ejiptunmaya̱ṉka Uunt Yus Israernaka jí̱i̱kmiayi. Tura Yúsnan etserniuja̱i̱ṉ péṉker wainniakmiayi.

¹⁴ Túrasha Eprainkia Yusan akajak tí itiurchat enentáimtikraiti. Túmaitkiusha ní numpe̱ja̱i̱ṉ ni túramunka akikmaktatui. Tura ni yajauch túramuja̱i̱ métek ni Úuntri̱ṉkia makuttawai.